Real Madrid tan hna a awlsam

Copa del Rey round of 16 chu Nilaini zan khan khelh a ni a, La Liga hmahruaitu Real Madrid chuan quarterfinal lut turin harsatna an tawk lo. 

Zinedine Zidane-a naute hian Real Zaragoza chu 4-0 in an sawp a, Madrid khaw club tan Raphael Varane, Lucas Vazquez, Vinicius Junior leh Karim Benzema te chuan goal khat ṭheuh 

an khung. 

Champion lai Valencia, Athletic Bilbao, Villarreal, Granada leh Real Sociedad-te chuan quarterfinal an lut ve bawk a, nizana Barcelona inkhel result erawh kan hre hman lo. 

Zaragoza khelmuala inkhelah Real-in goal khung turin hun an mamawh rei lo a, defender Varane chuan tun season-a a goal thumna tur chu minute rukna lekah a rawn khung. 

Minute 32-naah Vazquez-a'n Real goal hnihna a khung a, second half-ah kum 19 mi Brazilian rawlthar duhawm Vinicius Junior chuan goal thumna rawn khung ve lehin chak tur a chiang tawh. 

Hun tawp nan minute 11 chauh a awm tawh a, bench aṭanga luhtir Benzema inlar hun a ni. December 15 hnua goal khung leh tawh lo striker hian goal net a rawn zawng hmu a, an striker rinrawlin goal-a khung leh ta hi Real tan thawk huaina tham a ni ang. 

Season hmasa final-a Barcelona ngamtu Valencia-in season zawna nomawi chawi an tum a, third division club Cultural Leonesa chu goal khung loin inhnehtawkpui mah se penalty-ah 4-2 in an hneh. 

Cultural Leonesa hian round of 32-ah club ṭha Atletico Madrid chu rin loh takin an lo hneh tawh a, champion lai Valencia pawh an hneh teuh hle - Julian Luque-a'n first half-a hnai set sawt aṭanga crossbar a pet per kha an ui khawp ang. 

Extra time-ah pawh team pahnihin goal an khung thei lo a, penalty hmangin chak zawk zawn a ni. Valencia goalkeeper Jaume Domenech chuan a penalty hmachhawn hmasak pahnih a save a, 4-2 in Valencia an chak phah. 

Villarreal-in second division club Rayo Vallecano laka chak turin minute 80 piahlam an nghah thlen a ngai a, goal an khung loh reng hnuah minute 83-na leh 85-naa an goal hmangin 2-0 in an chak. 

Yellow Submarine (Villarreal sawina) tan Fernando Nino chuan an goal hmasa zawk a khung a, Santi Cazorla chuan theihna sang tak a la nei reng tih pholangin an goal hnihna a khung zui.

Athletic Bilbao-in second-division club Tenerife chu penalty-ah 4-2 in an hneh a, Real Sociedad chuan Osasuna chu 3-1 in an ngam a, Granada chuan 3-2 in Bajoz an hneh bawk.