Billboard album chart thununtu Eminem

January 17 khan puangzar lawk loin album thar 'Music to Be Murdered By' a tlangzarh thut a, chuti chung chuan Billboard 200 album chart-ah pakhatna a ni leh der tawh.    

Kum 47 mi, rap legend Emi­nem chuan a album tlangzarh thar hmangin rimawi khawvel a thunun leh mek tawh a, 2018-ah khan hetiang thilmak hi a ti tawh bawk. 'Kamikaze' album kha puangzar lawk loin a tlangzarh thut tawh bawk a, a fan-te a barakhaih hle. Chuti chung chuan Billboard album 200-ah pakhatna a nihpui tho.

A hla thute avangin nasa taka sawiselna tawk mah se ngaithlatu an kiam phah lo a, 'Music to Be Murdered By' chu Billboard 200 chart thununtu a ni leh ta der mai. 

January 23 thleng khan US-ah chuan album unit 279,000 a hmuchhuak hman a ni. Vawi maktaduai 226 tehmeuh mai stream a ni tawh bawk a, khawvelin Eminem a lo la duh hle a ni.

Billboard 200 chart-ah a zawnin album 10 No.1 a thlenpui Eminem, a hming tak Mar­shall Bruce Mathers III hian studio album 11 tichhuak tawhin heng zinga 10 hi  Billboard 200 chart-ah No.1 a nihpui. A album hmasa ber tih loh chu Billboard chart-ah hian No.1 a nihpui vek thei. A record nihrual tur hi chuan zaithiam lar dangte chuan an beih ve fat fat a ngai tawh ngei ang.

Eminem hian Kanye West record lo siam tawh sa, 'most No. 1 debuts' record a rawn khum a, Kanye khan album pakua a zawnin No.1 a nihpui a, he record hi Eminem hian rawn thaichhiain a rawn khum ta a ni.

Billboard 200 chart-a album 10 tal No.1 nihpui thei hi khaw­velah an la tam lo hle a, paruk chiah an la awm.

The Beatles record erawh khum hautak tak tur a ni a, album 19 No.1 an nihpui thei, rapper tho Jay Z chuan 14 nihpui theiin, Bruce Springstein chuan 11 a nihpui thei bawk. Barbra Streisand khan 11 nihpuiin Elvis Presley khan Eminem ang bawkin album 10 No.1 a nihpui a ni.

American singer, tunlaia boruak nei lian tak Halsey chuan Eminem hi a tluk zo ta lo a, a album tlangzarh boruak nei lian tak tho 'Maniac' chu No.2-a nihpui ta thung a ni. 

Ani hian album units 239,000 a hmuchhuak a, a tan erawh chuan hlawhtlinna ropui tak a ni tho a, album a tlangzarh kara a hralh ṭhat ber ṭum a la ni phak tho. 

Billboard 200 chart Top 5

1    Music To Be Murdered By - Eminem

2    Maniac        - Halsey

3    Circles        - Mac Miller

4    Please Excuse Me For Being Antisocial - Roddy Ricch

5    Hollywood's Bleeding    - Post Malone