ZORO-in CAA an duh loh avangin Human Rights Council-ah an thlen

Zo Reunification Organi­sation (ZORO) chuan nimin khan MUP building-a MCCI conference hall-ah Chin-Lushai Conference vawi 128-na an hmang a; thusawitu ZORO president R Sangkawia chuan, Citizenship (Amendment) Act (CAA) chu ZORO-in an duh loh thu leh CAA chungchang chu Human Rights Council-ah an thlen thu a sawi.

ZORO President chuan, CAA chu ZORO-in an duh lo tih sawiin, "Sakhaw tih bikna dan hi kan duh loh avangin Human Rights Council-ah lehkha kan thehlut a, Human Rights Council pawhin kan lehkha thehluh an hmuh thu min lo hrilh tawh. CAA hi khua leh tui tan dan ṭha lo tak a nih avangin kan theih ang angin kan dodal zel dawn a ni," a ti.

R Sangkawia chuan, tualṭo hnamte'n an dinhmun leh chanvo dik tak an chan theih nan UNO-in thâ leh sum a séng tam tawh hle nia sawiin, "Tualṭo hnamte dinhmun siam fel tur hian UN-in kum 10 dan zelah a buaipuitu tur a siam a, tuna kan dinhmun mek hi a vawi thumna leh a tawpna a ni. Kum 2024 hi a hun tawp a ni a, 2024 hma hian keini Zo fate pawh kan inbuatsaih a ngai," a ti a; theihtawp chhuah tlan a ṭul thu a sawi.

ZORO ṭhalai president L Ramdinliana Renthlei pawhin thu sawiin, ZORO chu political party a ni lo tih a sawi a, "Zo fate rorelna pakhat hnuaia kan awm theih nan leh Zo fate khawvel hmun hrang hranga awmte kan inpumkhatnaa kan insuihkhawm theih nana hma latu a ni. Hemi tihlawhtling tur hian ZORO ṭhalai chu kan kal dawn a, nasa zawkin awareness campaign kan nei dawn a ni," a ti.

Chin-Lushai Conference hi ZORO treasurer Michael Lalthanmawia'n a kaihruai a; Zo Inpui sakna tura hmalak mek chu chak lehzuala kalpui ni se, tiin an rél a ni.