Tuk khatah hnam dang ILP nei lo Mi 70 chuang MZP-in hmu chhuak

MZP chuan nimin khan Ai­zawla kâwn hrang hrangah hnam dang dan loa khawsa an awm leh awm loh an enfiah a, Inner Line Permit (ILP) nei lo hnam dang 70 chuang hmu­chhuakin, sorkar thuneitute kutah an hlân.

MZP tarlan danin, dan loa hnam dang awmte dap hnatlangah hian MZP hruaitute bakah college hrang hrang students union hruaitute leh hnampual zirlai pawl hruaitute an thawk chhuak. Hnam dang dan loa khawsa an hmuhte chu ILP nei lo te, ILP atan anmahni leh anmahni lo in sponsor-te leh hnam dang vêkin an lo sponsor-te an ni.

MZP chuan, sorkar leh thuneitute'n theihtawp chhuaha hma an lak mek laia tûk khat hnatlannaa hnam dang ILP nei loa khawsa leh dan loa sumdawng tam tham tak man chhuah tur an awm chu pawi an tih thu an tarlang a, "Hnam dang dan loa khawsa hmuhchhuahte chincháng ngun takin kan en zui dawn a, thawn kîr (push back) an nih dan pawh Vairengte thlenga ûm zui a ni ang," an ti.

ILP chu a nihna ang taka hmang tur leh a pek chhuah danah fimkhur leh zual turin sorkar thuneitute an ngen tih sawiin MZP chuan, "Ram leilung fate'n khawpuiah in luah tur harsa taka an zawn ṭhin laia dan loa awm hnam dangte'n awlsam taka in luah tur an hmu mai ṭhin hi pawi kan ti hle a ni," an ti a; Mizorama khua/veng village council/local council hotute chu hnam dangte ILP pek chungchangah document felfai lo chu hriatpuina lehkha pe tawh lo turin an ngen a ni.

MZP chuan, Mizorama dan loa hnam dang sumdawngte dap chhuakin a ṭul angin hma an la zel dawn tih puangin, "Hnam dang dan loa sumdawngte dapchhuah kawngah Mizo mipui thlawpna kan ngen tak meuh a ni," an ti.