KṬP General Conference atan inpeih thawkhat :

Kumin February 27 - March 1 chhunga KṬP General Conference vawi 68-na neihna tur Serchhip khawpui chu an inpeih thawkhat tawh a, pandal pawh peih thawkhat a ni tawh. Inkhawmpui pandal chu zanin hian Pathian hnena hlanna inkhawm neih tur a ni a, Chhimchhak Presbytery moderator Rev. C Lalrintluanga'n a hlan ang. Pandal hlanna inkhawmah hian inkhawmpui puala souvenir an siam chu bialtu MLA Lalduhoma'n a tlangzarh nghal dawn a ni.

Pandal saknaah thâ tam tak sèn a ni tawh a, Presbyterian Kohhran mite chauh ni loin, kohhran pawl dang ṭhalaite pawh pandal saknaah an tel ṭhin.He inkhawmpuia mimal chanvo nei turte hlanna inkhawm chu February 20, 2020 zan khan Zarkawt Kohhran Hall-ah neih a ni a, Synod moderator Rev. R Lalchangliana'n hlanna hun a hmang. Mizoram páwn leh India ram páwn aṭanga tel turte pawh an awm a, Wales aṭanga tel turte chuan February 22, Inrinni khan Aizawl an lo thleng tawh a ni. KTP General Conference kal lam leh haw lama Aizawl paltlang turte'n lirthei tlân loh ní kaihhnawiha harsatna an tawh lohna turin Aizawl Traffic SP chuan phalna a pe a; lirthei tlan loh ní leh kal lam / haw lam inangte chu motor-ah chhinchhiahna  siam tur a ni a, A5 paper aia tê lo-ah thlenna tur counter number leh bial/branch hming chiang taka ziakin lirtheiah tàr ngei tur a ni.