Coronavirus kái rinhlelhin a kai lo Mizoramah Coronavirus kai la hmu lo

Coronavirus (COVID-19) kai rinhlelh vanga State Referral Hospital-a a bika siam pindana enkawl damlo pakhat chu Coronavirus kai a ni lo tih finfiah a ni. Hetih lai hian, Mizoram hmun ṭhenkhata enfiahna hmunah Coronavirus kai hmuh a la ni lo.

Health & Family Welfare department hotute hnen aṭanga thu dawn danin, February thla tìr lam khan Mizo damlo pakhat chu fimkhur thilah State Referral Hospital-a hmun bik siamah dah niin, a bika enkawl a ni a, Coronavirus a kai tih finfiah a nih vanga dah a ni lo. Mi pakhat sample test result chu a chhuak tawh a, Coronavirus a kai lo tih finfiah a ni.

Integrated Disease Surveillance Programme (IDSP) state nodal officer Dr Pachuau Lalmalsawma chuan, State Referral Hospital-a a bika enkawl chu fimkhur thila dah a nih thu leh, a dam lohna ang chu Coronavirus awm hma pawha a awm fo thu a lo sawi tawh a ni.

India leh Bangladesh inrìna bul, Kawrpuichhuaha Coronavirus vei rinhlelhawm an awm leh awm loh enfiahna screening point-ah February 22, Inrinni thleng khan mi 202 endik a ni tawh a, rinhlelhawm leh Coronavirus kai hmuh a la ni lo.

Kawrpuichhuaha screening point hi Tlabung MNF Block-II hruaitute leh Lungleia MNF Sub-Hqrs aiawhte chuan a hmunah kalin thawktute an kâwm a ni. Thawktute chuan, Februa­ry 10, 2020-a screening point siam a nih aṭanga tun thlengin ramri kâna veivâk mi 202 an enfiah tawhah COVID-19 kai leh rinhlelhawm an la hmuh loh thu an lo hrilh.

Tlabung MNF Block-II president P Vanlalmawia chuan, Mizoram chhung­a Coronavirus hri hlauhawm a lên lohna tura Health Minister hmalaknaa Kawrpuichhuaha screening point kalpui mek a ni chu lawmawm an tih thu leh an thlamuanpui thu an sawi a; tlawmngaia duty-te puih theihna an nei a nih chuan an thâ tichak turin puih an inhuam thu a sawi bawk.

Health department chuan, ram dang aṭanga Mizorama lutte'n COVID-19 an vei leh vei loh enfiahna hi Kawrpui­chhuah bakah, Zokhawthar leh Lengpui Airport-ah an kalpui mek a; Coronavirus chungchanga harsatna emaw, sawi tur emaw nei chuan phone no. 82599 30355 leh 76309 43153-ahte hriattir theih a nih thu an tarlang a ni.