AMC inthlan leh MLA by-election Neih hun tur hriat theih a la ni lo
Aizawl Municipal Corporation (AMC) leh Serchhip biala MLA by-election neih hun tur hriat theih a la ni lo. Hetih lai hian, inthlan buaipuitu turte chu a ṭul angin an inbuatsaih zel.
Vanglaini palai zawhna chhángin joint chief electoral officer (joint CEO) David L Pachuau chuan, Serchhip biala MLA by-election buatsaih tur chungchangah Election Commission of India (ECI) aṭangin thu dawn an la neih loh thu a sawi a, "ECI-in inthlan an puan huna ṭha taka inthlan buatsaih a nih theih nan a ṭul ang kan buaipui a, inthlan puan huna buaipui theih chauh pawh eng emaw zat a awm dawn," a ti.
David L Pachuau sawi danin, MLA by-election neih a nih dawnin, by-election neihna tur bial chu bial ruaka puan a nih aṭanga thla ruk chhungin inthlan buatsaih tur a ni.
Assembly speaker Lalrinliana Sailo chuan MNF MLA 12-te'n Serchhip bial aṭanga MLA atana thlan tlin Lalduhoma an hêkna chungchangah November 27, 2020 khan thutlukna a puang a, Lalduhoma chu MLA aṭangin a bàn a ni. December 3, 2020 khan Assembly Secretariat chuan notification chhuahin Serchhip bial chu bial ruak atan a puang.
Aizawl Municipal Corporation inthlan chungchanga Vanglaini palai zawhna chhángin state election commissioner (SEC) Laima Chozah chuan, inthlan hun turah thu thar an la neih loh thu a sawi.
Laima Chozah sawi danin, AMC danah inthlan buatsaih a nih dawnin, state sorkar ráwn chunga inthlan hun ruat tur a ni. SEC chuan state sorkar a la beráwn lo. Covid-19 léng mek dinhmun thlir a ni a, boruak thlir chungin inthlan tur atan inbuatsaihna erawh kalpui reng a ni.
Sorkar hnuhnung ber chu December 9, 2020 zanlai khan a tàwp a, Mizoram sorkar chuan an term pawtsei loin, AMC enkawl turin AMC commissioner K Laldingliana chu administrator atan a ruat a ni.