Sao Paula school-a inkahna thlengah mi 10 thi

Brazil chhim lama Sao Paul khawpui, Suzano-a school pakhatah Nilaini khan mi pahnihin silai an pawng kah a, mi pariat kaphlumin a hnuah an intihlum zui ve leh nghal a ni. 

Police-te chuan school building-ah hian hmaituam mi pahnih lutin, silai bakah chem leh thalte an keng niin an sawi. Silai an hmehpuaha thi hi zirlai paruk leh zirtirtu pahnih an ni a, midang eng emaw zatin hliam an tuar bawk. Zirlai thite hi kum 15 leh 16 an ni. 

Silai hmetpuaktute hi he school-a kal ṭhin, kum 17 leh 25 mi an ni a, car rental agency neitu chu kaphlumin a motor an ruksak bawk a ni. 

Brazil ram hi tharum thawhna thlen hluarna ram ni mah se, school-a inkahna erawh a thleng khat hle. School-a inkahna thleng hnuhnung ber chu Rio de Janeiro-ah kum 2011 a thleng niin zirlai 12 an thi a ni.



Share this Post

Login to comment
No Comments