US-in Beoing 737 MAX dintir ve leh

Ethiopian Airlines thlawhtheihna, Boeing 737 MAX tlaah mi 157 an thih hnuah ram eng emaw zatin thlawhtheihna hi a him tawk lo anga ngaiin an ram airlines-te chu hetiang thlawhtheihna hman hi an khapsak a, US President Donald Trump chuan hman a khap ve leh ta. 

Boeing pawhin an thlawhtheihna tharin chhiatna a tawh avang hian Nilaini khan khawvel puma 737 MAX thlawhtheihna a pekchhuah tawhte pawh dintir rih a rawt bawk. 

US-ah hian 737 MAX thlawhtheihna register hi 74 a awm a, khawvel pumah airlines 59-ten 387 an hmang mek a ni. MAX series hi Boeing-in thlawhtheihna siam zinga a hralh chak ber a ni. 

Boeing president, CEO leh chairman Dennis Muileburg chuan a company website-ah thuchhuah siamin, ram hrang hrangten fimkhur thila 737 MAX thlawhtheihna an dintir chu an thlawp thu a sawi a, an thawhpui dangte nen thlawhtheihna chetsualna chhan chu hriatfiah tumin leh a himna zawkna tur te, hetiang chetsualna hi a thlen nawn tawh lohna turin theihtawp an chhuah mek tih a sawi.

Ram hrang hrangten an ram airlines-te 737 max thlawhtheihna hman an khap hnuah US chuan a khap ve mai lo a, mahse Nilaini khan President Trump chuan a khap ve leh ta a ni. President thupek angin US Federal Aviation Administration (FAA) chuan US airlines-te hnenah 737 MAX thlawhtheihna an neihte chu din tir vek turin a ti. 

Ethiopia chuan Pathianni-a tla, flight ET 302 black box chu France-ah thawnin, a chetsual chhan tak an hriatchhuah theih a beisei thu a sawi. Hetihlai hian FAA acting chief Daniel Elwell chuan thlawhtheihna chetsual chhan hi hriatchhuah tumin theihtawp an chhuah tih a sawi a, mahse black box flight data recorder chu a chhiat avangin an duh angin an thawk chak thei lo tih a sawi. 

Pathianni-a Ethiopia Airlines thlawhtheihna tla hi thla li pawh an la hmang tling lo a, Addis Abbas aṭanga Nairobi pana a thlawk tur chu a thlawhchhuah aṭang a minute ruk hnu lekah chesualin a tla a ni. Thlawhtheihnaa chuang, khualzin leh thawktu mi 157-te chu an thi vek a ni. 



Share this Post

Login to comment
No Comments