UK parliament-in 'no-deal' hnawl

United Kingdom (UK) chuan Prime Minister Theresa May-in European Union (EU) aṭanga Britain inlakhranna tura inremna a siam, Withdrawal Agreement chu an hnawlsak hnuah, inremna siamloa inlakchhuah mai rawtna chu an hnawl leh bawk. 

March 29-ah EU aṭangin Britain hi a inlahrang tawh dawn a, hetihlai hian EU hruaitu leh PM May-i ten inremna an siam chu Parliament hian ṭum nih a hnawlsak tawh a, mahse hetichung hian inremna siam loa inlakchhuah erawh an duh chuang lo a ni. 

EU nena inṭhenhran dawna inremna mumal tak siam a nih chuan UK economy bakah EU-a cheng UK mi leh sate tan nghawng ṭha lo a nei thei dawn niin a ngai a, hei bakah hian a bikin sumdawng tenau zawkte pawhin an tuar nasa zual dawn niin an ngai bawk. 

May-i chuan inremna siam loa inlakchhuah hi an pawm thei lo a nih chuan, inremna siamṭhat a nih leh theih nan UK aṭanga an inlakchhuah hun tur, Article 50 pawhsei chungchangah vote lak leh a nih tur thu a sawi. Hei hi an pawm a nih chuan May thla tawp lama European Parliament session-ah UK hi a la tel ve leh a ngai dawn a ni. Hemi rual hian Article 50 pawhsei hi EU member ram 27 ten an pawmpui ve vek a ngai ang. 

EU lam chuan UK inlakhran hun tur tikhawtlai hi an duh lo a, UK hian tihkhawtlai a duhna chhan ṭha tak a pek a ngai ang, a ti. 



Share this Post

Login to comment
No Comments