Trump-a budget plan-ah defence tan 5% tipung

US President Donald Trump-an 2020 budget plan a siamah defence tana sum dah chu 5% in a tipung. Hei hi a thil buaipui mek, ramri hungna bang siamna tura a ruahman tel nia ngaih a ni a, hetihlai hian diplomacy fund erawh chu 23% in a tihniam thung. 

President Trump-a budget plan hi Congress in a pawm chuan, kum 2020 atana defence lam tana sum hman tura dah hi US dollar tluklehdingawn 750 in a pun belh dawn. Fiscal year 2020 hi kumin October thla aṭang hian a inṭan dawn a ni. 

Defence budget atana sum ruahman zinga dollar tluklehdingawn 718.3 chu Pentagon tana tih niin, nuclear arsenal enkawltu leh fuel petu Energy Department tan dollar tld 32 ruahman a ni bawk. Budget plan-ah hian Afghanistan, Iraq, Somalia leh Syria-a beihpui an thlak mekna atan dollar tld 66.7 ruahman a ni bawk a, heihi budget hmasaa dah aiin 3% in a tlem thung. 

'Emergency fund' atan dollar tld 9.2 dah a ni a, hemi aṭanga dollar tld 2 chu thlipui tlehin a tihchhiatte thuam ṭhatna tura dah a ni. A bak hi chu Trump-an Mexico ramri hungna bang siam a lo tiam tawh atana hman a ni ang. Cyberdefence-ah pawh kum hmasa lam aiin budget dah hi  10% in tihpun a ni bawk. 



Share this Post

Login to comment
No Comments