Pakistan-in ECL aṭangin Sharif leh a chhungte paih duh lo

Pakistan sorkar chuan an ram prime minister hlui Nawaz Sharif, a fanu Maryam leh a makpa Mohammad Safdar ten Exit Control List (ECL) aṭanga paih tura ngenna chu a hnawl. 

Kum 2018 August 20 khan Prime Minister thar Imran Khan-a kaihhruai cabinet meeting chuan Nawaz Sharif leh a fanute nupa hi ECL-ah hian an dah a, hemi kum vek October thla khan Sharif-te hian Interior Ministry hnenah ECL aṭanga an hming paih tur hian an ngen a ni. Ngenna an thehluhah eirukna, thuneihna dik lo taka hmang, firfiaka chetnaa inhnawih leh ram phiarruknaa inhnanhmawiha puhnaah an tel loh vangin Exit From Pakistan Rules 2010 hian a huam ve lo niin an sawi. 

Mahse Interior Ministry chuan kar kalta Inrinni khan an ngenna hi a hnawlsak a ni. 

Nikum July thla khan Sharif, Maryam leh Safdar te hi rampawna ram neia puhna, Avenfield properties case-ah Accountability Court chuan thiam loh a chantir a, kum 11, kum riat leh kum khat tang turin a hrem. September 19 khan Islamabad High Court chuan Avenfield case-ah thiam loh chantir an nihna hi hnawlin jail aṭangin a chhuahtir a ni. 

Mahse nikum December thla khan Islamabad-a Accountability Court chuan kum 69 mi, Sharif hi Al-Azizia Steel Mills graft case-ah thiam loh chantirin kum sarih tang turin a hrem leh a, Lahore-a Kot Lakpat tan-inah tantir a ni. 



Share this Post

Login to comment
No Comments