Thailand lal-in Princess Ubolratana-in inthlan a chuh tum remti lo

Thailand lal, King Maha Vajiralongkorn-an a farnu, Princess  Ubolratana Rajakanya Sirivadhana Barnavadi-in an ram prime minister thlan tura chuh a tum chu a remtih loh avangin Princess hi candidate a nihna aṭangin a inhnudawk. 

Thailand lal chhungkua hi an ram politics-ah hian an inrawlh ngai meuh lo a,  kar hmasaa Princess Ubolratana-in PM aṭanga paihthlak tawh, Thaksin Shinawatra-a thlawptu party, Thai Raksa Chart party hminga inthlan chuh a tum thu a sawi pawh khan sawizui a hlawh hle. 

Mahse kar kalta Zirtawpni zan khan King Vajiralongkorn chuan a farnu, Princess Ubolratana-in inthlan chuh a tum ve chu thil awm lo a nih thu sawiin, an ram danpuiin lal chhungkuate politics-a inrawlh lo tura a duhna nena thil inmil lo tak a nih thu a sawi a ni. 

King Vajiralongkorn-an inthlana chuh a tum ve chungchang a ngaihdan a nih loh thu a sawi tak avangin Princess Ubolratana chu Inrinni khan candidate a nihna aṭangin a inhnukdawk nghal. Kum 67 mi, Princess hian Thailand mipuiten duhsakna leh thlawpna an lantir avangin an chungah a lawmthu a sawi nghal bawk. An ram chuan hma sawn zel se a duh thu leh, mitinin an dikna chanvote an neih vek a, hlim leh nuamsa taka an awm theihna tur kawng inhawng vek se a duhsak thu a sawi. 

Thailand inthlan hi March 24 hian neih a ni dawn a, hei hi kum 2014-a sipai chakna hmanga sorkar paihthlak a nih hnua inthlan buatsaih lehna hmasa ber tur a ni. 



Share this Post

Login to comment
No Comments