Venezuela : Guaido-an chhawmdawlna lakluh a tiam

Venezuela eptu hruaitu leh acting president-a inpuang, Juan Guaido chuan US-in an ram mipuite chhawmdawlna tur a thawn, President Nicolas Maduro kaihhruai sorkarin a lo dan chu ramchhunga lakluh a nih ngei theihna tura beih a tiam. 

President Maduro-a thupekin chhawmdawlna phurtu motor-te hi an ram chhunga an luh theih lohna turin sipaite chuan Colombia ramri bula lei chu an lo dang a ni. Sorkar official chuan US chhawmdawlna pek tum hi an ram awpbehna tur hmahruai a ni tiin, hemi laka an ram lo venghim turin dikna an nei tih a sawi. 

Venezuela sorkar chuan eptu hruaitu Guaido thlawptu, US President chuan Venezuela rama tuialhthei chu thunun a duh niin a sawi. 

Venezuela sum dinhmun tlahniam leh hun eng emaw chen politics buaina an tawh avangin mipuiten an tuar nasa tawh hle a, mi tam tak chuan an duh khawp ei tur pawh an lei thei tawh lo a, damdawi pawh a vang hle a ni. 

Mipuite chhawmdawlna tur hi US chuan a thawn a, mahse heihi Venezuela sipaite chuan an rama lakluh an remti lo. Heng chhawmdawlna phurtu motor liante hi Venezuela leh Colombia inkalpawhna pawimawh, Simon Bolivar International Bridge-ah an lo dang a, nimin thleng khan lei-ah sipaite hi an la awm chhunzawm a ni. US in ei tur leh damdawi a thawnte hi Colombia ramri-a wareshouse-a chhawp rih a ni. 

Guaido chuan ramdangten an ṭanpui loh chuan Venezuela mi tam tak chu dinhmun harsa takah an awm dawn tih a sawi a, hei vang hian lei-a chhawmdawlna phurtu an lo dan hi titawp a, mipuite ṭanpuina tura hi lakluh a nih theihna turin theihtawp a chhuah dawn tih a sawi. Venezuela rama hruaitu eng emaw zat pawhin sipaite hnenah motor-te hi an rama luh phalsak turin an ngen bawk.



Share this Post

Login to comment
No Comments