India ramah Mercedes-Benz car hralh a kal

Mercedes-Benz India chuan nikum chhung khan India rama an car siamchhuah 15,538 zet an hralh a, an hralh hnem ber ṭum an tawng niin an tarlang. 

Mercedes-Benz hian India rama luxury car siam chhuaktu dang BMW leh Audi-te an khum a, a zawna kum li chhung No.1 an hauhna a ni tawh. An car siamchhuah zingah hian - Mercedes-Benz C-Class, Mercedes-AMG E63S leh Mercedes-AMG G63 SUV-te chu hralh kal zual niin, kum hmasa aiin 1.4% in hma an sawn a ni.  Mercedes-Benz E-Class chu an hralh chuah hnem ber a ni a, Mercedes-Benz GLC SUV chu hralh a tla viau bawk. 

Mercedes-Benz hian kumin chhungin model thar 10 zet tihchhuah an tum a, a vawi khat nan V-Class luxury MPV pawh chawkluh an tum a ni. GLE SUV leh C-Class coupe-te chu mipui hip tur an ni dawn a, A-Class hatchback tlangzarh an la tum cheu bawk. 

Mercedes-Benz India CEO Martin Schwenk chuan nikum October-December thla chhung khan nasa taklin hma an sawn tih a sawi a,  luxury car hralhchhuah 40% zet chu an hui niin a sawi. Mercedes-Benz hi India rama luxury car siam leh hralhchhuak hnem ber an ni mek. Khawvela luxury car hralhchhuak hnem ber an ni mek bawk a, kum 2018 chhung khan car 23,10,185 zet an hralh a ni. 



Share this Post

Login to comment
No Comments