DR Congo president thlanah eptu hruaitu chak

Democratic Republic of Congo president thlan result chu hun eng emaw chen tikhawtlai a nih hnuah nimin khan electoral commission chuan a puang a, eptu pawl hruaitu Felix Tshisekedi a chak. 

Felix Tshisekedi hian vote maktaduai sarih chuang a hmu a, vote tla aṭanga 38% a hmu pha a ni. Rorellai party candidate Emmanuel Ramazani chuan vote maktaduai li chuang a hmu bawk. Congo President nilai Joseph Kabila chuan inthlan hi a chuh ve thei tawh lo a, kum 18 zet ro a rel hnuah thlak a ni dawn ta a ni. 

Kum 56 mi Tshisekedi hi eptu pawl hruaitu hlun, Etienne Tshisekedi fapa a ni a, kum 2018 kumtir aṭang khan eptu pawl hruaitu atan hian dah ani. President thlan result tihchhuah a nih hnuah an party, Union for Democracy and Social Progress party headquarters-a thu a sawiah, President kalchhuak tur Kabila chu zahna hlanin, a khingpui anga a enzui dawn loh thu leh, an rama democracy tundinna kawnga a thawhpui anga a en tur thu a sawi. Tshisekedi chuan an rama retheihna umbo chu a hna hmasa ber tur a nih thu a sawi bawk. 

Hetihlai hian president candidate zinga mi, sumdawng lian Martin Fayulu chuan inthlan result chu a pawm loh thu a sawi a, an ram mipuite pawhin an pawm dawn lo niin a sawi. Tshisekedi-an vote maktaduai sarih zet a hmuh theih dan hi a awm lo tih a sawi a ni. France pawhin Fayulu thusawi hi a thlawp a, inthlan result chu an lo rin dan ang lo tak a nih tih sawiin, result chu an zirchian tur thu a sawi. Inthlannaa observer 40,000 zet tirtu, Catholic Church pawhin inthlan result chu election commission tihchhuah nen an inang lo niin a sawi bawk a, thil dik tawk lo a awm nia an hriat chuan result chu an hnawl tur thu an sawi. 



Share this Post

Login to comment
No Comments