Canada-ah Huawei executive Meng Wanzhou man

Chinese telecom giant, Huawei company dintu Ren Zhengfei fanu, Meng Wanzhou chu Canada-ah man a ni a, US-ah thawn tum a ni. 

Huawei chief financial officer leh deputy chair, Meng Wanzhou hi December 1 khan Vancouver, Canada-ah man a ni. Man a nih dan kimchang hi tarlan a ni lo a, mahse US chuan Huawei company hi Iran a hrekna palzuta puh a nih chungchangah a chhuichiang mek a ni. 

Canada-a China embassy chuan Meng man a ni hi sawiselin, chhuah tura an phut thu a sawi. Embassy chuan thuchhuah siamin, US ngenna avangin Canada hian China mi, America leh Canada dan bawhchhe miah lo chu a man a ni, a ti. 

Hauwaei pawhin an company hotu puhna chungchang hi engmah hriat an nei lo tih sawiin, Meng Wanzhou-in thil tih dik loh a neih an hriat loh thu a sawi. 

Canada ministry of justice chuan Meng man a nih thu leh, a man hun leh hmunte hi sawiin, US-ah lak tum mek a ni tih a sawi a, nimin khan bail a dilna chu ngaihtuah a ni bawk tih a sawi. 

Huawei hi khawvela telecommunications equipment leh services provider lian ber zinga mi a ni. Tunhnaiah Apple lehpelin, Samsung dawta khawvela smartphone siamtu lian ber a ni chho a ni. US commerce and treasury department chuan Iran leh North Korea a hrekna palzutah he firm hi a puh a, hei bakah US lawmaker te chuan company technology hi China sorkarin US enthlakna atan a hmang thei nia sawiin an ram himna pawh tiderthawng thei niin an lo sawi fo tawh bawk. Security thil avangin New Zealand pawhin Huawei hmanrua hi a lo block tawh a, hemi hma hian Australia pawhin Huawei leh communication firm dang ZTE pawh an rama hman a lo khap tawh bawk.



Share this Post

Login to comment
No Comments