Afghanistan chungchang sawipui turin Pakistan-ah US palai zin

US special envoy Zalamy Khalilzad chu Thawhlehni khan Pakistan-ah a zin a, kum 17 chhung zet Afghanistan tualchhung indona thleng tihtawp a nih theihna tura Taliban-te inbiakna neihpui a nih theihna tura US hmalakna chungchang Pakistan hruaitute a sawipui dawn. 

Khalilzad-an Pakistan a pan hma hian US President Donald Trump chuan Pakistan Prime Minister Imran Khan hi lehkha a thawn a, Afghan war tihtawpna tura inbiakna a awm theihna tura thawhpui tur leh hma lak pui turin a lo sawm tawh a ni. 

Imran Khan hian Afghanistan tualchhung buaina tihtawp chu Pakistan pawhin a duh a, a ṭhenawm rama remna leh muanna a awm theihna tur chuan theihtawp a chhuah niin a sawi. 

Khalilzad hian Pakistan foreign ministry leh security official-te kawmin, Afghanistan dinhmun hi a sawipui dawn a ni. Afghanistan-a remna leh muanna a awm theihna tura US hmalakna thlawp tura sawmin Afghanistan, Russia, Uzbekistan, Turkmenistan, United Arab Emirates leh Qatar ramte pawh tlawh a tum bawk. 

Afghanistan-origin Khalilzad hi kum 2001-a Taliban sorkar a tlak hnuah khan hetihlaia US President George W Bush-a special envoy a ni a, a hnuah Afghanistan-ah US ambassador in a awm zui bawk. 



Share this Post

Login to comment
No Comments