Pakistan-in 'sin tax' lak a tum

Pakistan sorkar chuan an ram mipuite hriselna atana ṭha lo thilte laka an venna tur kawng khat atan cigarette leh sugar contents sanna soft drink, candy leh sugar telin 'sin tax' lak a tum. 

National Health Services minister Aamer Mahmood Kiani chuan tunhnaia press conference a neihah, Prime Minister Imran Khan-a kaihhruai sorkar thar chuan health budget tihpun a tum thu leh, taksa hriselna tichhe thei thil siamchhuahte pawh dapchhuah an tum thu an sawi. Hemi atana an hmalakna kawng khat atan vaihlo kaihhnawih leh sugar content tamnaah 'sin tax' hi lak a ni dawn tih a sawi a, he chhiah an lak aṭanga sum an hmuhte chu health budget-ah chhunluh a ni ang, a ti. 

NHS ministry chuan 'sin tax' chungchang hi a hmaa zirchian anih thu sawiin, a term pawh hian international-a pawm a ni, a ti. US pawhin sin tax atan hian cigarette pack pakhatah dollar 1.5 vel zel a la a, UK pawhin sugary  beverage-ah litre khatah sin tax-ah pence 40 zel a la bawk niin a tarlang. Hei bakah hian ram dang eng emaw zat pawhin healthcare service tihchakna tur atan taksa tana ṭha lo chi thil hrang hrangah sin tax ang chi chhiah an la bawk niin a sawi. 



Share this Post

Login to comment
No Comments