France PM-in fuel tax tihsanna titawp

France Prime Minister Eduoard Philippe chuan fuel-a chhiah lak tihsan chu tihtawp lailawk a nih thu a sawi. 

Fuel tax tihsan vang hian France ram chhung hmun hrang hrangah nawrh huihawt a ni a, nawrh huaihawttu 'yellow vest' tia sawite hian hmun tam takah tharum thawhna thlenin, thil tam tak an tihchhiat bakah nunphung pawh a buai phah hle. 

PM Philippe chuan Thawhlehni zana TV-a thu a sawiah, fuel tax tihsan a nih vanga mipuite lungawilohna chu hriat loh theih a ni lo tih sawiin, hei vang hian he chhiah lakna thar hi thla ruk chhung chu hman a ni dawn rih lo tih a puang a ni. 

Yellow vest-ten fuet tax sang duh lohna lantira nawrh an huaihawtnaa buaina chhuakah mi pali an thi tawh a ni. 

Philippe chuan thla ruk chhung fuel tax sanga lakna tur chu tihtawp lailawk a ni dawn tih sawiin, hemi chhung hian hma lak dan turah mi hrang hrang rawn kual an ni dawn tih a sawi. PM chuan kumin thlasik chhung atan gas leh electricity man tihsan tumna pawh tihtawp rih a nih thu a sawi bawk. 

France President Emmanuel Macron-a kaihhruai sorkar chuan an ram chhunga sik leh sa inthlak danglam chak venna leh budget indaihlohna tihziaawmna kawng khat atan fuel tax tihsan hi a ngai niin a lo sawi awh a ni. 



Share this Post

Login to comment
No Comments