Rohingya hruai kir tumna chawlhsan turin UN in ngen

United Nations chuan Bangladesh leh Myanmar sorkar hnenah Rohingya raltlante Myanmar-a Rakhine state-a hruai kir an tumna chu chawlhsan rih turin a ti. 

Myanmar rama kir leh hi Rohingya mite tan hian a la him tawk lo a, tihhlum an tawh mai a la hlauhawm hle niin UN human rights investigator chuan a sawi. Nikum August thlaa Myanmar sipaiten beihpui an thlak aṭang khan Bangladesh ramah hian Rohingya mi nuai sarih chuang an raltlan a ni. 

October 30 khan Bangladesh leh Myanmar chuan November thla laihawl aṭangin Bangladesh-a Rohingya raltlan awmte hi Myanmar rama hruaikir hna thawk ṭan turin inremna an lo siam tawh a ni. Mahse UN refugee agency, UNHCR chuan Rakhine state dinhmun chu a la him tawk lo niin a sawi. 

Myanmar-a UN special rapporteur on human rights Yanghee Lee chuan ram pahnihte hnenan hian an ruahmanna siam chu la kalpui rih lo turin a ngen. Myanmar sorkar chuan Rohingya hoin hun rei tak an lo phut tawh - khua leh tui nihna pek, zalen taka an chetvel leh public service an hman phalsak an phutna te remtihsak phawt turin a ngen a ni. 



Share this Post

Login to comment
No Comments