Sri Lanka President thlawptu dy minister a bang

Sri Lanka President Maithripala Sirisena chuan Parliament-ah thlawptu an ngah tawk nia a sawi hnu lawkah, United People's Freedom Alliance (UPFA) sorkara a deputy minister Manusha Nanayakkara chu Thawhlehni khan a bang. 

Manusha Nanayakkara hian President Sirisena-an October 26-a prime minister aṭanga a ban tak, Ranil Wickremesinghe lamah a ṭang dawn tih a sawi. 

President Sirisena leh Prime Minister thar atana a ruat Mahinda Rajapaksa-te thlawptu MP 96 list-ah Manusha Nanayakkara pawh hi a tel a, mahse Thawhlehni khan President hnenah a banna  lehkha hi thehluin, Wickremesinghe chu dan ang taka an ram prime minister dik tak a la ni reng nia a ngaih thu sawiin, heihi Parliament speaker Karu Jayasuriya pawm dan pawh a ni, a ti. 

Nanayakkara hi November 1 khan deputy minister of Labour and Foreign Employment atan lakluh a ni chauh a ni. Video message a tihchhuahah, Nanayakkara chuan  PM ban a ni dan leh, a aiah midang ruat a nih dan chu a pawm thei lo tih sawiin, an rama democracy tundin a nih theihnan theihtawp a chhuah dawn tih a sawi.

Sri Lanka politics buaina a thlen hnu hian Parliament member eng emaw zat chuan an ṭan lam an thlak kual tawh a, Rajapaksa lam leh Wickremesinghe lam hian House-ah majority an nei niin an inchhal ve ve a ni.  Media report chuan MP-te hi an ṭan lam thlak turin suma thlem an ni nasa hle a, cheng maktaduai 500 thleng ten an thlem niin an tarlang. 



Share this Post

Login to comment
No Comments