IS ten an thahte ruang paihna hmun hmuchhuak

Iraq ramah Islamic State (IS) firfiakten an mi thahte ruang an paihkhawmna hmun, thlanmual 200 chuang zet hmuhchhuah a nih thu United Nations chuan a tarlang. 

Thlan-a ruang hmuh zingah hian hmeichhia, naupang leh kum upa zawk bakah rualbanlo te, Iraq armed force leh police member te pawh an tel niin report chuan a sawi. Kum 2014 June leh December thla inkara IS firfiakten Iraq hmarlamah ram zau tak lain an lalramah an puang a, hemi kuma inbeihna thlenga hian civil mi 33,000 vel thah an nih bakah, mi 55,000 chuangin hliam an tuar niin UN chuan a sawi. 

Thlan hmuchhuahte hi Iraq hmarlam leh khawthlang lam, Syria ramri bula Ninewa, Kiruk, Salah al-Din leh Anbar province-ahte an ni. Heng bialah hian IS firfiakte hi kum 2017, December thlaa US kaihruai ṭangrual pawl puihnaa Iraq sipaiten firfiakte hi an hneh hma khan an inkhuar a ni. 

UN chuan thlan 202 hmuhchhuahah hian ruang 6,000 -12,000 vel an awm rin a nih thu a tarlang a, mahse thlan 28 chu laihchhiat a nih tawh avangin a zat dik tak erawh hriat a harsa tawh a ni. 



Share this Post

Login to comment
No Comments