US Mid-term poll : Democrats-in House-ah hnehna chang

US Mid-term election, nimina neih zawh takah Demcoracts chuan Congress lower chamber, House of Representative-ah majority neiin, Republican lam chuan Senate an la thunun chhunzawm zel. 

Democrats hian kum riat chhunga House-a majority an neih ṭum khatna a ni. House thununtu an nih tak avangin President agenda te pawh an lo dang thei dawn ta a ni. 

Mahse US President Donald Trump-a party, Republican chuan Senate-ah an thuneihna an sawhnghet sauh thung. 

Mid-term election hi kum li danah neih a ni a, President ṭanglaite dinhmun hriltu pawimawh tak a ni. President Trump hian nakkum January thla hian a president nih kum hnihna a hmang zo dawn a, midterm election-a chet ṭhat tum pawhin a campaign ngawrh hle a ni. 

House of Representative-a seat awm zawng zawng, seat 435 leh member 100 awmna Senate-a seat 35 bakah govenorship 36-ah mid-term election hi neih a ni. 

President Trump chuan House-a an party thuneihna hloh ni mah se, Senate-ah an thuneihan sawhngheh belh a ni chu hlawhtlinna ropui tak a ni tih sawiin, mipuite lawmthu a hrilh. 

Tun ṭum mid-term election-ah hian US Congress member atan a ṭum khat nan Muslim hmeichhe pahnih thlan tlin an ni. Democrats candidate Ilhan Omar (37) leh Rashida Tlaib (42) te chu Minneapolis, Minnesota leh  Dearborn, Michigan-ah thlan tlin an ni a, Rashida-i hi chuhtu awm loin a tling a ni. Democrats candidate vek, mahni anpui  kawp a nih thu puangzartu Jared Polis chu Colorado governor atan thlan tlin a ni bawk. 



Share this Post

Login to comment
No Comments