Bangladesh PM hlui Khaleda Zia dinhmun ṭha lo

Eiruk thubuaia thiam loh chantir vanga jail-a tang mek, Bangladesh prime minister hlui Khaleda Zia chu a hriselna ṭhat tawk loh avangin High Court thupek angin kar kalta Inrinni khan damdawi-inah dah luh a ni a, Zia hian a kut vei lam a hmang thei lo nia sawi a ni.

Bangabandhu Sheikh Mujib Medical University hospital-a doctorte chuan Zia-i hi an enfiah nghal a, hun rei tak rheumatoid arthritis a lo neih tawh avangin a kut vei lam chu a hmang thei tawh lo niin an sawi a, a dar veilam pawh a ṭhat loh  bakah a nghawng leh hnungzang a na bawk a, diabetes a nei bawk tih an sawi. 

Khaleda Zia-i ukilte chuan sorkarin a tanna hmunah enkawlna ṭha a pek duh loh avangin a hriselna dinhmun hi a ṭhat loh phah niin an sawi. Zia-i hi thiam loh chantir a nih hnuah kum zabi 19-a British colonial rule laia sak Dhaka Central Jail-ah amah chauha hren a ni. 



Share this Post

Login to comment
No Comments