Kim Jong-un an zin turin Pope Francis a sawm

North Korea ram hruaitu Kim Jong-un chuan Roman Catholic Kohhran hotu Pope Francis chu an rama zin turin a sawm niin South Korea sorkar chuan a sawi. 

South Korea Presidnet Moon Jae-in hi Roman Catholic a ni a, kar leh hian ni hnih chamin Vatican tlawh dawn a, Pope hmuh a tum. Hemi hunah hian North Korea-in zin tura Pope a sawmna hi a hlanchhawng dawn niin a thupuangtu chuan a sawi. 

Moon Jae-in hian Korean Peninsula-a boruak ṭha a awm theihna tura hma lak pui turin Pope hi a sawm dawn a ni.

Thla hmasa khan Moon leh Kim te hi North Korea khawpui, Pyongyang-ah an inhmu a, Kim hian SKorea President hnenah hian Pope-in an ram a tlawh chuan lawm taka an lo dawnsawn tur thu a hrilh a ni. 

Pope zingah North Korea tlawh hi an la awm lo a, NKorea sawmna pawh hi Pope Francis hian a pawm dawn nge dawn lo tih Vatican lam chuan a la sawilang lo. Kum 2014 khan Pope  hian South Korea a tlawh a, a thlen hma lawkin North Korea chuan short-range rocket chu an ram khawchhak lam aṭangin a kapchhuak a, Pope in SKorea a thlen hnuah rocket pahnih a kapchhuak leh bawk.



Share this Post

Login to comment
No Comments