UN-a US ambassador Nikki Haley a bang

United Nations-a US ambassador Nikki Haley-i chu kum hnih dawn a thawh hnuah a bang. 

Kum 46 mi, South Carolina governor hlui Nikki Haley-i hian Thawhlehni khan a ban thu hi a puang a ni. President Donald Trump chuan Haley-i banna hi a pawmsak nghal a, Oval Office-a an pahniha an inlannah  Haley-i chuan hna ropui tak a thawh thu a sawi. 

Trump-a cabinet-a hmeichhe tlemte zinga mi, Haley-i hian a banna chhan a sawi lo a, mahse kum 2020-ah president chuh a tum nia thuthang awm erawh chu a dik lo tih a sawi. President Trump chaun Haley-i thlaktu tur hi kar hnih thum hnuah ruat fel tum a ni tih a sawi nghal bawk. Trump chuan Haley-i hian thla ruk kalta khan kumin kumtawp lamah chawlh a duh thu pawh a lo hrilh tawh niin a sawi. 

Nikki Haley-i hian a banna chhan leh, a ban hnuah eng hna nge thawh chhunzawm a tum a sawilang lo a, thutlukna mumal pawh ala siam lo niin a sawi. An ram president thlan leh hunah pawh Trump-a tan a la campaign zel tur thu a sawi. 

Donald Trump chuan Nikki Haley-i chu a tana mi special tak a ni tih sawiin, hna a thawk ṭha a, mi ropui tak a ni tiin, eng tik hunah emaw a rawn kir leh a beisei thu a sawi. 

Nikki Haley :

Nikki Haley-i nu leh pa hi India ram aṭanga pem lut an ni a, South Carolina-a Bamberg-ah Sikh sakhua hnuaia seilian a ni a, a hnuah Kristian-ah a in let a ni. Kum 13 mi a nihin an chhungkaw thawmhnaw dawr-ah a thawk ṭhin. Army National Guard Captain Michael Haley nen inneiin fa pahnih an nei. 

Kum 2010 khan South Carolina governor atan thlan tlin niin, hmeichhe zingah leh minority zinga he dinhmun chelh thei hmasa ber a ni a, US-a governor naupang ber a ni bawk. Kum 2014 khan thlan nawn leh a ni. 

Kum 2015-a Charleston khuaa mihang biak-in inkahna a thlen hnuah, state capitol aṭanga Confederate flag a lakthlak tir avangin ram pumah fak a hlawh phah hle. Kum 2016-a US president thlanna neih tura campaign lai khan a tirah Trump hi a thlawp mai lo a, Florida Senator Marco Rubio a thlawp hmasa zawk a ni.



Share this Post

Login to comment
No Comments