US House-in ui leh zawhte sa ei a khap

US House of Representative chuan Nilaini khan ei tura zawhte leh ui talh khapna dan a pass. 

Dog and Cat Meat Trade Prohibition Act, 2018 hmang hian dan bawhchhiate chu US dollar 5,000 thleng chawitir theih an ni ang. 

House chuan resolution dang siam bawkin, ramdang a bikin China, South Korea leh India-te chu ui leh zawhte sa hmanga sumdawnna titawp turin a ngen bawk. Congresswoman Claudia Tenney chuan, "Ui leh zawhte hi ei tur ni loin ṭhianṭha zawk an ni. Mahse vanduaithlak takin China ram bikah pawh kumtinin mihring ei turin ui hi maktaduai 10 chuang zet talh ziah an ni", a ti. Hetiang thil hi an ramah a thlen ve an remti lo tih a sawi. 

Congressman Verna Buchanan pawhin, America rama chhungkaw zahve aia tam chuan ui emaw zawhte emaw vulhin, an chhungkaw zinga mi ang hialah an dah tih a sawi. Hetiang ranvulh te ei tur atana tihhlum an ni ṭhin chu an pawm ve thei lo a, hrem zel an ni dawn a ni, a ti. 

Animal welfare organisation, Animal Wellness Action (AWC) chuan House-in ui leh zawhte humhalhna tur bill a pass chu lawmawm a tih thu a sawi. 



Share this Post

Login to comment
No Comments