Suu Kyi-in court thutlukna siam a chhan

Myanmar court-in Rohingya Muslim-te chungchang chhuitu Reuters journalist pahnihte State Secret Act  hnuaia thiam loh a chantir chu ram hrang hrangten dem mah se, Myanmar ram hruaitu Aung San Suu Kyi-i chuan court thutlukna siam dan chu a chhan thung. 

Suu Kyi-i chuan journalist pahnih, Wa Lone leh Kyaw Soe Oo-te chuan international law an bawhchhia a, thiam loh chantir an nihna chu freedom of expression palzutna lam kaihhnawih a ni lo, a ti. 

Journalist pahnihte hi Rakhine state-a Rohingya Muslim-te thah an nih dan an chhuinnaah police document kawlah puhin man an ni. Mahse anni chuan heng document-te hi police-te an pek niin an sawi thung a, document an pek hnu lawkah police-te hian an man zui a, hei hi man an nih theihnanan a phiarrukna niin an puh a ni. 

UN rights body chuan Myanmar chu journalist-te dodalna campaign kalpuiah a puh a, Reuters journalist-te hrem an nih chungchangah Suu Kyi-i a ṭawngchhuah mai loh avangin sawisel pawh a hlawh hman a ni. Mahse nimina Vietnam-a international economics conference an hmannaah Suu Kyi-i hian hemi chungchang hi sawichhuakin,  court thurel sawiseltu tam takte chuan hrem an nihna chhan dik tak an chhiar chiang lo a ni, a ti. 

Suu Kyi-i chuan thiam loh chantir journalist pahnihte chuan court thutlukna siam dan chu a dik lo tih sawiin an appeal thei tih a sawi. 

Human Rights Watch chuan Suu Kyi-i hi chhang nghalin, a hre dik tawk lo a ni, a ti. Deputy Asia Director Phil Robertson chuan, "Suu Kyi-i hian rule of law dik tak hi a hrechiang lo a ni" tiin, court rorelna kalpui dan kawng hrang hrangah Reuters journalist pahnihte chungthu rel a nih dan chu a dik lo a ni, a ti. 

Wa Lone leh Kyaw Soe Oo-te hi nikum December 12 khan man an ni a, man an nih lai hian Rakhine state-a thingtlang khaw pakhata Rohingya Muslim 10-te thah an nih dan an chhui chiang mek a ni.  September 3 khan kum sarih tang turin court chuan thiam loh a chantir a ni. 

Nikum August thla aṭanga Myanmar sipaiten Rakhine state-a beihpui an thlak avangin Rohingya Muslim nuai sarih chuang zet chu Bangladesh ramah an tlanchhe tawh. Ram hrang hrangten Myanmar sipaite chetdan an dem thu sawiin, an chet dan hi Rohingya hnam thenfai tumna niin an puh. Mahse sipaite chuan border post beitu Rohingya helho chauh an bitum niin an sawi thung. 



Share this Post

Login to comment
No Comments