Punjab House annex-ah Imran Khan cheng dawn

Pakistan Prime Minister thar tur Imran Khan chu PM atana lakluh a nih hnuah pawh Islamabad-ah Punjab House annex-ah a cheng  dawn a, kar tawpah erawh Banigala-a a mimal inah a awm ṭhin ang. 

Pakistan Tehreek-e-Insaf (PTI) chairman Imran Khan hian PM atana lakluh a nih hnuah pawh a official residence atan Prime Minister House chu a hmang dawn lo tih a lo sawi tawh a ni. Hei vang hian lakluh a nih hnuah Punjab House annex-ah hian chen a tum a ni. Punjab House hi PM Office aṭang pawhin a la hla vak lo a, he hmunah kartin ni 4-5 vel awmin, kartawpah Banigala lam a pan ṭhin dawn a ni. 

PTI hruaitu Naeemul Haq chuan Imran Khan hian amah avanga traffic tihtawp pawh a duh lo a, a veivahnaah khawpui chhunga chengte tana harsatna siam a duh lo tih a sawi. 

Pakistan PM thar atana Imran Khan lakluh hun hi tihchian a la ni thei lo. PTI chuan August 11 ah lakluh tur angin a lo sawi tawh a, mahse report ṭhenkhat Independence Day an hman zawh hnu, August 16 emaw 17-ah emaw lakluh a ni zawk dawn niin an tarlang. PTI hian Parliament-ah sorkar siam tur member mamawh zat an la neih chian loh avangin Khan-a lakluh hun tur hi tihkhawtlai a la nih thu an tarlang. 

Imran Khan hi an rama eirukna dotu, National Accountability Bureau (NAB) chuan dik lo taka Khyber Pakhtunkhwa province sorkar helicopter hmansaka puh chungchangah August 3 khan thu zawhfiah turin a ko. Khan hian inthlan dawn khan provincial sorkar helicopter hi darkar 72 chuang a hmang nia puh a ni a, hemi vanga sorkarin sum a sen hi cheng maktaduia 2.17 chuang a tling a ni. Imran Khan hi a mimal thilah sorkar helicopter hi a hman phalsak a ni lo a ni. 

NAB chuan Khan leh a lawyer-te chu zawhna 15 zawtin, hengte hi ni 15 chhunga a chhanna thehlut turin an ti a ni. Khan chuan tihdik loh engmah a nei lo tih  a sawi thung. 



Share this Post

Login to comment
No Comments