Novichok hman vangin Russia hrek dawn

UK-a Russia spy hlui beihna atana Russia-in nerve agent, Novichok a hman avangin US chuan Russia hrekna a siam thar dawn. 

Kumin March thla khan UK-a Salisbury-ah Russia spy hlui, Sergei Skripal leh a fanu Yulia-te chu tur hmanga beih an nih vang hian damloin dinhmun hlauhthawnawm takin an awm hman a, mahse damdawi-inah enkawl an nih hnuah tunah chuan an dam ṭha tawh a ni. UK chuan Sergei-te pafa beihnaah hian Russia a inrawlh niin a sawi a, mahse Russia chuan a pha thung. 

US state department chuan Nilaini khan thuchhuah siamin, Novichok hman vanga Russia hrekna thar siam a nih thu a sawi. Russia chuan international law kalhin an mi leh sate chungah ngei chemical weapon a hmang a ni, a ti. 

UK chuan US-in Russia hrekna a siam chu lawmawm a tih thu a sawi a, hetihlai hian Russia chuan a sawisel thung. 

Russia ram hrekna hi August 22 aṭanga hman ṭan tur a ni a, he hrekna hian electronic leh technology thawnchhuah lam a nghawng dawn a ni. US chuan Russia hian chemical weapon a hmang chhunzawm tawh dawn lo tih a intiam loh chuan ni 90 hnuah hrekna dang pawh siam a nih tur thu a sawi. 



Share this Post

Login to comment
No Comments