US-in Panama president hlui thawn haw

US chuan Panama president hlui Ricardo Martinelli chu an rama a thubuai hmachhawn turin Thawhṭanni kha a thawn haw niin US State Department chuan a tarlang. 

State Department thupuangtu Heather Nauert-i chuan Martinelli puhna chungchanga thutlukna chu Panama court kutah a awm tur a ni tiin, hei vang hian thawn haw a nih thu a sawi. 

Martinelli hi kum 2017, June 12 khan Florida-ah man a ni a, Panama sorkar chuan an rama thawn kir turin a ngen a ni. Kum 66 mi, Martinelli hi kum 2009-2014 inkar khan Panama president a ni. A president chhung hian sum tichingpena puh a nih bakah, phone call leh inbiakna dangte pawh dan kalha lo enfiah ṭhinah puh a ni bawk. Mahse an puhna hi thu dik lo niin Martinelli chuan a sawi thung. 



Share this Post

Login to comment
No Comments