Trump-Summit neih a ni ta

US President Donald Trump leh North Korea hotu Kim Jong-un te chuan nimin zing dar 9 khan Singapore-ah meeting an nei ta. US President ṭanglai leh NKorea hotu in meeting an neihna hmasa ber a ni. 

Donald Trump leh Kim Jong-un te hi Sensota thliarkara Capella Hotel-ah an inhmu a, meeting hlawhtling tak an nei niin an sawi. Hruaitu pahnihte hi tawng ṭettu telin minute 38 chhung an inkawm a, hemi hnu hian ram pahnih palaite ho nen an inkawm zui leh a ni. President Trump hi US Secretary of State Mike Pompeo, security adviser John Bolton leh White House Chief of Staff John Kelly-ten an ṭawiawm a, Kim hi spy chief hlui Kim Yong-chol, foreign minister Ri Yong-ho leh Worker's Party of Korea Central Committee vice chairman Ri Su Yong ten an ṭawiawm bawk. 

Trump-Kim summit neih tur hi khawvelin a ngaihven hle a, meeting neih hma hian hruaitu pahnihte hi ṭawngkamin an inbei fo a, hei bakah meeting hi ṭhulh mai tur ang ten an sawi hman a ni. Mahse ruahman lawk angin nimin khan meeting hi an nei thei ta a ni. 

Meeting-a hian NKorea-in nuclear programme a kalpui tihtawpna tur document pawh an ziak  nghal a, mahse an document-a thu an ziah kimchang erawh puanzar nghal a ni lo. He document-ah hian thu hlawm pawimawh pali an ziak a, chungte chu - US leh NKorea chuan ram pahnih mipuite duhthusam anga remna leh  muanna a awm theihna turin inlaichinna thar leh ṭha zawk siam tumin an bei ang, Korean Peninsula-a muanna tluantling a awm theih nan ram pahnihte chu an thawk dun zel ang, April 27, 2018 Panmunjom Declaration a sawi angin NKorea chuan Korean Peninsula-a nuclear ralthuamte tibo vek turin a bei ang, US leh NKorea chuan POW/MIA ruang zawn hna an thawk chhunzawm zel ang a, hei bakah ruang finfiah tawhte pawh an inpe tawn ang, tihte a ni. He document hi media-te hnenah pekchhuah ni lo mah se, President Trump chuan camera hmaah a lek lang a ni. 

Ram hruaitu pahnihte hian meeting an neih zawh hian chaw chhun an kil dun nghal a, he hunah hian US President Secretary Sarah Sanders leh Kim-a farnu Kim Yo-jong te pawh an tel. 

Donald Trump chuan Kim nena an meeting chu mi zawng zawng beisei aiin an hlawhtling nia sawiin, Kim nen chuan inpawhna ṭha tak an neih thu a sawi. Kim pawhin remna leh muanna kawl a eng dawn tih sawiin, tunhma thil ṭhil ṭangkai lo takte chu theihnghilh a ni tih a sawi bawk. Chaw chhun an kil zawh hnuah Trump hian Kim hi presidential limousine, 'The Beast' pawh a entir a ni. US President motor, 'The Beast' hi tone kua-a rit, bullet proof niin, bombproof a ni bawk. 

Trump chuan NKorea nuclear programme titawpna tur tihfel a ni thuai dawn tih a sawi a, meeting hlawhtling tak an neih thu sawiin Kim pawh chu White House tlawh tura a la sawm ngei tur thu a sawi. Kim chu talent nei ṭha tak niin, a ram a hmangaih hle tih pawh a zirchhuak nghal tih a sawi. Kim pawhin khawvel chuan thil inthlakthleng lian tham tak a hmu dawn a ni tiin, meeting an neih theih avangin President Trump chunga a lawm thu pawh a sawi.



Share this Post

Login to comment
No Comments