Catalan hruaitu thar atan Quim Torra thlang

Spain-a Catalonia regional Parliament chuan Catalan president atan kum 55 mi, Quim Torra a thlang. 

Catalonia parliament-ah Thawhṭanni khan vote lak a ni a, Spain aṭanga inlakhran thlawptu Quim Torra hian president atana thlawptu vote 66 hmuin, a duh lo lamah vote 65 a tla thung. 

Nikum October thlaa Catalan hruaituten Spain aṭanga inlakhran duh leh duh loh chungchanga mipui ngaihdan an lak hnu leh,  independence an puan hnu khan Spain sorkar chuan Catalan sorkar hi ṭhiatin, sorkar laipui rorelna hnuaiah a dah zui  nghal a ni. Catalan sorkar ṭhiah a nih hnu hian Catalan president Carles Puigdemont leh a thawhpui mi pagna-te chu ram dangah an tlanchhe zui a, inlakhran duhtu pawl hruaitu dangte pawh man an ni bawk. Mi 25 chu sorkar laka hel, hel tura midang fuih leh eiruknaa inhnamhnawiha puhin thubuai siamsak an ni bawk. 

Puigdemont hi Berlin-ah a la awm a, Catalan president chuh zui a tum loh thu sawiin Quim Torra president candidate atan hian a rawt a ni. Torra hi politics a luhchilh hmain multi-national insurance company hotu a ni ṭhin a, Catalan chanchin ziahna lehkhabu leh chanchinbu tihchhuahna, publishing company a enkawl ṭhin bawk. 



Share this Post

Login to comment
No Comments