Jerusalem-a US embassy sawn sawisel

US President Donald Trump-an kum 2016 President thlan dawna a lo tiam tawh angin, US sorkar chuan Israel rama a embassy chu Tel Aviv aṭangin Jerusalem-ah a sawn a, Thawhṭanni khan Jerusalem-a US embassy hi hawn a ni. Embassy sawn hi Arab leh Muslim ram hruaitute chuan an sawisel nasa hle. 

Embassy hawnna inkhawm hmang tur hian US aṭangin palai an kal a, Israel rama foreign diplomat 86-te pawh sawm vek an ni a, mahse ram 33 aiawhte chauh an tel a ni. 

East Jerusalem hi Palestinian miten Palestine ram a din huna an ram khawpui tura an ngaih a nih vangin Jerusalem-a US embassy sawn hi an dodal nasa hle a, ram hrang hrang pawhin US thutlukna siam hi an sawisel a ni. 

Member ram 22 awmna, Arab League chuan US thutlukna siam hi thil dik lo tak ni a sawiin, Israel-in dik lo taka Jerusalem a luahsak chhunzawm zel chungchang chu khawvelin a ngaihven a ngai a ni, a ti. US embassy sawn chu Arab leh Muslim mipuite rilru tihnatna a ni tiin, international law palzutna niin a sawi. Palestinian-te chuan embassy sawn chungchang ngaihtuah tur hian Arab League chu vawiina urgent meeting nei turin an ngen. 

Iran Foreign Minister Mohammed Javad Zarif-a chuan Jerusalem-a US embassy hawn a ni chu thil zahthlak tak a nih thu a sawi. Iran parliament speaker Ali Larijani chuan Tel Aviv ṭanga Jerusalem-a US embassy sawn leh, Iran nuclear deal aṭanga US  inhnuhdawh chungchang chu ngawih bopui mai a ni dawn lo tih a sawi bawk. US thiltih hian Middle East leh khawvel huap pawhin boruak ṭha lo zawk a siam a ni, a ti. 

Lebonon Prime Minister Saad Hariri chuan a Twitter-ah US thiltih chuan Arab, Muslim leh Kristian-te thinurna a belhchhah niin a sawi. Lebanon-a Hezbollah group pawhin US-in Israel khawpuia Jerusalem a pawmna chu Palestinian-te chuan an pawmsak ngai dawn lo a, hei vang hian thil awmze nei lo a ni tiin a sawi. 

Palestinian President Mahmoud Abbas chuan Jerusalem-a US embassy hawn a ni chuan a ti thinur hle tih a sawi a, President Trump-a kaihhruai US sorkarin Israel-Palestinian inremna siam tuma a hmalakna leh rawtna neihte chu an pawm thei tawh dawn lo tih a sawi. 

Palestinian thlawpna lantirin kawng zawh

US-in Israel ram a embassy, Tel Aviv aṭanga Jerusalem-a a sawn chu Palestinian mite chuan nasa takin an dodal a, Palestinian mite thlawpna lantir hian Turkey-a Istanbul khawpuiah Thawhṭanni khan mi tam takin kawng an zawh. 

US thlutlukna siam duh lohna lantir leh, Jerusalem-a US embassy dah dodalna lantira kawngzawh huaihawtnaah hian mi 6,000 vel an tel. Nawrh huaihawt zinga telte hian US flag-te an hal a, Turkey sorkar chu an rama Israel embassy khar turin an phut bawk.

Turkey Deputy Prime Minister Bekir Bozdag chuan Tel Aviv leh Washington-a an palaite chu biakrawn tura an koh haw thu a sawi niin Thawhṭanni zan khan a sawi. Turkey official-te chuan US President Donald Trump-an US embassy sawn a tum hi a hma aṭangin an lo sawisel fo tawh a ni. 

Istanbul-a kawngzawhte chuan Turkey leh Muslim mipuite chuan Palestinian mite chu an thlahthlam dawn loh thu sawiin, US leh Israel-in awpbeh a tumna laka chhuak turin an beihpui zel dawn tih an sawi. 

Gaza-a nawrh huaihawtnaah mi 55 thi

US-in Jerusalem-a a embassy a hawn ni, Thawhṭanni khan Palestinian mite chuan Gaza ramri-ah nawrh an huaihawt a, nawrh huaihawt leh Israel security force-te inbeihnaah Palestinian mi  55 an thi a, mi dang 1,200 chuangin hliam an tuar. 

Israel leh Gaza Strip-a roreltu, Hamas-te inkara indona a chhuah hnu, kum 2014 aṭang khan Thawhṭanni kha ramri-a nikhat thil thua thisen chhuahna a thlen nasat ber ṭum a ni. Palestinian mite hian nilengin ramri-ah hian nawrh huaihawtin motor ke te an hal a, ramri vengtu Israel sipaite chu firebomb leh lung hmangin an bei bawk.

Israel sipaite silai hmehpuaha thi, Palestinian mi 55 zingah hian naupang pali an tel niin Gaza Health Ministry chuan a sawi a, hliam tuar zinga mi 116-te chu an dinhmun a ṭha lo hle niin a tarlang bawk a ni. 

Palestinian mite chunga Israel sipaite chet dan hi ram hrang hrang hruaituten an sawisel nasa hle a, United Nations pawhin mihring dikna chanvo palzut sakna lian tak niin a sawi. 

Mahse Israel Prime Minister Benjamin Netanyahu chuan Israel sipaite chu mahni invenna atana che an ni tih a sawi a, Israel tihchhiat vek tumtu Hamas te lakah invenga hetianga an chet hi a ngai a ni, a ti. Eng ram pawhin a ramri venghim tura dikna a nei a ni tiin a sawi. An ram venghim tur chuan theihtawp an chhuah zel tur thu a sawi a ni. 

Israel chuan Gaza Strip ramria hmun 13-ah Palestinian mi 40,000 velin nawrh hi huaihawtin, tharum thawhna pawh an thlen nasa niin a sawi. 



Share this Post

Login to comment
No Comments