US, France leh UK-ten Syria an bei Syria chemical ralthuam dahtṭatna an kapchhia

Syria sipaiten an ram khawpui, Damasus khaw daia helho kuta awm, Douma khua laklet tuma a beihnaah tur hlauhawm, chemical ralthuam a hmang nia sawi chhan let nan, kar kalta Inrinni zing khan US, France leh UK sipaiten Syria ram hmun hrang hrang an bei. 

Syrian Observatory for Human Rights chuan US leh a thurualpui ramte hian missile hmangin Syria sipaite hmun leh Science centre ṭahnem tak an kapchhia niin a sawi. 

Beihpui thlak a nih hma, Zirtawpni zan khan US President Donald Trump chuan rawng tak leh mi mawl anga maia Syria sorkar chetna chu chhanglet turin ram pathumte chuan an dikna leh thuneihna an hmang a ni, a ti. Beihpui thlak hnuah Britain Prime Minister Theresa May-i leh France President Emmanuel Macron-te chu telephone-a biain, an beihpui thlak chu a hlawhtling hle niin an sawi a ni. 

Pentagon hotu, Lt Gen Kenneth McKenzie chuan target pathum an fuh thu sawiin, Syria chemical weapon programme chu bul ṭan that ngai khawp tur an siamsak thu a sawi. Damascus khaw bula Barzah chemical weapons research and development centre chu missile 76-a kahfuh a ni a, heng zinga 57 chu Tomahawk cruise missile niin, centre hi kahchhiat vek a ni. Him Shinshar chemical weapon center, Homs khaw bula mi chu missile 22 hmanga kahfuh niin, heng zinga pakua chu US Tomahawk niin, British Storm Shadow pariat bakah France kahchhuah naval cruise missile panga leh Scalp cruise missile-te an ni. Him Shishar chemical weapon bunker chu Scalp missile pasarih hmangin kahchhiat a ni bawk.

Gen Kenneth McKenzie chuan an aircraft leh missile-te chuan defence system hmanga lo tichhiat an awm lo tih sawiin, aircraft-te pawh an vaiin him takin an kir leh vek a ni. Beihpui an thlak hnu hian Syria hian defence missile 40 vel chu a kapchhuak a, mahse hemi hma zing dar 4 velah an target chu an lo kap fuh vek hmang niin a sawi.

Hetih lai hian Russia defence ministry chuan US-in cruise missile 103 a kahchhuah zinga 71 chu Syria chuan a kahthlak sak niin a sawi thung. US leh Russia chuan Inrinni-a Syria beihnaah hian thi an awm lo niin an sawi ve ve a, Syria chuan Homs khaw bulah mi pathumin hliam an tuar niin a tarlang.

Syria ram ṭhianṭha, Russia chuan ram pathumten Syria an beih dan chu dan kalh niin, nghawng ṭha lo tak a neih tur thu a sawi. Syria thlawptu dang, Iran ram pawhin US kaihhruaia Syria beih chuan thil ṭha lo zawk a hrinchhuah a hlauhawm thu a sawi a, he thil hian Syria leh a chhehvel bial security dinhmun tichhiain, firfiakte tan remchang a siamsak thei dawn a ni, a ti. 

Russia hian United Nations Security Council-ah US kaihhruaia Syria beih a nih dan demna resolution pass a rawt a, mahse a rawtna hi hnawlsak a ni. Russia President Vladimir chuan Douma-ah Syria sipaiten chemical ralthuam an hmang nia sawi chungchang chhuichianna result  hriatchian a nih hmaa ram pathumten chet an la nghal mai chu a dem thu a sawi. Syria chuan chemical ralthuam hmang nia puhna hi a pha reng a, helhoin an phuahchawp, thu belhchian dawl lo niin a sawi.

Chemical ralthuam hmanga nia puh chungchang enfiah tur hian Organisation for the Prohibition of Chemical Weapons (OPCW) inspector-te chuan Damascus an thleng tawh a, Douma-ah kal an tum a ni. 

NATO hotu Jens Stoltenberg chuan Inrinni-a US, UK leh France-ten chemical ralthuam hman vanga Syria an bei chu NATO ramte chuan an thlawp vek niin a sawi. Ram pathumten beihpui an thlak chu Syria sorkar-a chemical ralthuam a neihte tihchhiatna tur leh, heng ralthuam hmanga civil mite beihna thleng ṭhin tihtawp tumna a ni tiin, Syria sorkar thlawptu ram, a bikin Russia leh Iran-te chu Syria-a buaina thleng mekah an mawhphurhna la ngam turin a ti bawk. 

US President Trump chuan Syria-in chemical ralthuam a hmang leh a nih chuan US chu Syria bei leh turin a inpeih sa reng tih a sawi. UN-a US palai Nikki Haley-i chuan indonaa mihring tana tur hlauhawm hman a ni chu chhan let loha awm tir mai an remti ngai dawn lo tih a sawi bawk. 



Share this Post

Login to comment
No Comments