Catalonia-ah sorkar thar siam phutin kawng zawh

Spain aṭang indan duh, Catalonia region sorkar thar siam phutin Pathianni khan Barcelona-ah mi tam takin kawng an zawh. 

Kawngzawh huaihawt hi 'Republic Now' tia vuah a ni a, Catalonia independence thlawptu ANC huaihawt a ni. ANC vice president Agusti Alcoberro chuan Catalonia mipui maktaduai hnih chuang chuan Spain aṭanga inlakhran tum hmalakna chu kapui zel a, Catalonia ram hran din an duh a ni, a ti. 

Nikum December thlaa Catalan parliament inthlan neihah khan independence thlawptu lam hain seat 135 awmah majority an nei pha a, mahse tun thlengin sorkar thar an la siam thei lo a ni. 

Catalonia inlakhran duhtu pawl pahnih, Togerther for Catalonia leh ERC chuan kar hmasa khan Catalan Republic a din theihna tura ram danpui siamṭhat an rawt a ni. 

Spain Prime Minsiter Mariano Roy-a kaihhruai sorkar chuan Catalonia regional sorkar-in nikuma indepedence duh leh duh loh chungchanga mipui vote a lak chu dan loa tih nia sawiin, Catalan Parliament chu nikum October thla khan a ṭhiahsak a ni. Mi maktaduai 7.5 awmna Catalonia bial hi tun thlengin Spain sorkar laipui enkawlna hnuaiah a la awm a ni. 

Catalonia regional president thar tur hi tun thlengin thlan a la ni lo. Catalonia president hlui, ramdanga tlanchhe mek Charles Puigdemont chuan chuh a tum lo tih a sawi a, chuh tumtu awmchhun ANC president hlui Jordi Sanchez chu hruaitu dang pathum nen ram phatsantua puh an nih chungchangah jail-ah an la tang mek a ni. 



Share this Post

Login to comment
No Comments