Myanmar security force ṭhenkhat chungah action la dawn

Myanmar sorkar thupuangtu chuan Rakhine state-a Rohingya Muslim-te kutthlak leh kahhlum an nih chungchanga sipai ṭhenkhat chungah action lak a ni dawn tih a sawi. 

Nikum September thla khan Rakhine state-a Inn Din khuaah Rohingya mi 10-te chu thah a ni a, an ruangte hi a huhoin thlan pakhatah phum an ni. Heng mite hi Buddhist  mi leh Myanmar sipaite thah nia sawi a ni. 

Sorkar thupuangtu, Zaw Htay chuan he thil thleng hi sipaite chuan chhui chiangin, sipai pasarih, police pathum leh tualchhung mi parukte chu chhui bing an ni a, an chungah hian dan ang taka action lak a ni dawn tih a sawi. 

Sipaite chuan January thla khan Rohingya mi an kahhlumte hi security force  beitu, Rohingya firfiak pawl zinga mi niin an sawi. Heng mite hi Buddhist mi ṭhenkhat chuan ngunhnam nen an bei a, a ṭhen chu sipaiten an kaphlum bawk niin an sawi a ni. Mahse sipaite thusawi hi thil thleng mita hmutu, Rakhine Buddhist leh Rohingya Muslim-te sawidan nen a in ang lo a ni. 

Tualchhunga Buddhist mite chuan Inn Din khuaah firfiak leh helten security force an bei lo niin an sawi a, Rohingya mite pawhin sipaite hian tuipui kama himna zawnga tlanchhia Rohingya mi awmte zinga 10 chu an man niin an sawi. 

Nikum August thla aṭanga Rakhine state-a Myanmar sipaiten Rohingya muslim-te laka beihpui an thlak hnuah Rohingya mi 690,000 dawn chu Bangladesh ramah an tlanchhe tawh a ni. Hetihlai hian Myanmar sorkar chuan Rohingya civil mite beih tel an nih loh thu leh, security force-te beitu helpawlte chu bitum an nih thu a sawi. 



Share this Post

Login to comment
No Comments