Moscow bula thlawhtheihna tlaah mi 71 thi

Russia khawpui, Moscow bulah Pathianni khan thlawhtheihna tlain, thlawhtheihnaa chuang mi 71-te chu an vaiin an thi. 

Saratov Airlines thlawhtheihna, Antonov An-148 aircraft, Flight 703 hi Moscow-a airport lian ber dawttu, Domodedovo airport aṭangin an ram huna Pathianni chawhnu dar 2.48 khan a thlawk chhuak a, a thlawhchhuah hnu reiloteah km 40 vela hla, Ramenkoye khaw bulah a tla a ni. Thlawhtheihnaah hian passenger 65 leh thawktu paruk an chuang a, Moscow aṭanga Orsk khua pan tur a ni. 

Russia transport minister Maxim Sololov chuan thlawhtheihaa chuang zingah dam chhuak an awm lo tih sawiin, a tlak chhan tak hi hriatchian a la ni lo tih a sawi. Investigator-te chuan thlawhtheihnaa thawktute hnen aṭangin a hmain khawl lam ṭhat loh thu  report engmah a awm lo niin an sawi. Khaw chin ṭhat loh vang nge, pilot tihsual vang tih chhui mek a ni thu an sawi. 

Russia President Vladimir Putin chuan thlawhtheihna chesuala thi chhungte a tuarpui thu a sawi a, thlawhtheihna tlak dan chungchang chhui chiang tura special commission din turin a hriattir nghal a ni. 

Saratov Airlines hi Russia ramaa regional airlines zinga mi a ni a, kum 1930 vela din niin Russia rama khawpui 31-ah a service a ni. Pathiannia a thlawhtheihna tla hi kum riat kaltaa siam a ni. 



Share this Post

Login to comment
No Comments