UNSC-in Korea ram pahnihte hmalakna lawmawm a ti

United Nations Security Council (UNSC) chuan Korea ram pahnihten kum hnih chuang hnua official-a inbiakna an buatsaih leh thei ta chu lawmawm a tih thu a sawi a, mahse North Korea ram a hrekna erawh kenkawh chhunzawm zel a la ni. 

UN-a Kazakh ambassador Kairat Umarov chuan UNSC member-te chuan Korea ram pahnihten inhawng taka inbiakna an nei thei chu lawmawm a ti a, he inbiakna hian an inkarah boruak ṭha zawk siamna tur kawng hawngin, inrintawnna pawh an neih chhoh phah theih an beisei tih a sawi.

Mahse Security Council chuan NKorea-in nuclear weapon leh ballistic missile program a kalpui avanga a ram hrekna a siam chu hman chhunzawm zel a la ni dawn tih a sawi. 

Korea ram pahnih aiawhte hi Thawhlehni khan ramri bula Panmujom khuaah an inbia a, he meeting-ah hian February thlaa South Kore-a Pyeongchang-a Winter Olympics neih tur chungchang an thlurbing a ni. Inbiakna neih hnuah hian NKorea chuan Olympic Games-ah palai tirh an remtih thu a sawi. Hei bakah hian ram pahnih aiawhte chuan sipai thuneitute inbiakna neih tir leh pawh an remti bawk. 



Share this Post

Login to comment
No Comments