Colombia-in ELN nena inbiakna titawp

Colombia sorkar chu National Liberation Army (ELN) helpawl nena inremna zawnga kum khat zet inbiakna an lo neih tawh aṭangin a inhnukdawk. 

Sorkarin inbiakna a tihtawp chhan hi Colombia sipai leh ELN in inkahhai an puan a tawp hnu lawk, Nilaini-a sorkar hmun pawimawhte ELN helten an beih leh nghal vang a ni. 

Colombia sipaite chuan Nilaini-a sorkar hmun pawimawh pali beihna thleng leh, sipai pahnihin hliam an tawrh phahnaa mawhphurtuah ELN hi a puh a, an ram khawchhak lama oil pipeline pawimawh tak pawh tibuaiah an puh bawk. 

Colombia President Juan Manuel Santos chuan pawikhawihna thleng chu a dem thu sawiin, inremna siam turin kawng an la dap chhunzawm zel tur thu a sawi. President chuan ELN nena inkahhai an puan pawhsei tur hian an inpeih reng tih a sawi a, inbiakna pawh a thara buatsaih leh thuai an duh tih a sawi. Mahse ELN chuan remna leh muanna a awm theih nana sorkar hmalakna chu hnawlin, pawi an khawih chhunzawm leh nghal a ni, a ti. 

ELN aiawh leh sorkar aiawhte hi an ṭhenawm ram, Ecuador-ah kum 2017 February thla aṭang khan inremna kawng zawngin inbiakna an lo nei tawh a ni. 



Share this Post

Login to comment
No Comments