Palestinian raltlanten US chhawmdawlna tihtawp hlau

West Bank-a Palestinian mi, refugee camp-a khawsa mekte chuan US-in Palestinian raltlante chhawmdawlna a pek ṭhin tihtawpa a vau chu a taka a kalpui an hlauhthawng hle. 

United Nations Relief and Works Agency for Palestinian Refugees (UNRWA) chuan kum 70 dawn chu Palestinian refugee, mi maktaduai nga chuang te chhawmdawl hna a lo thawk tawh a, heng mite hi Israel-in Palestinian ram a luahsak leh an ṭhenawm rama chengte an ni. Raltlante hnenah hian ei tur an sem bakah, zirna, healthcare, social service leh employment thlengin an buaipui sak a ni. 

UNRWA hnuaiah US hi sum thawh hnem bertu niin, kum 2016 khan agency tan hian dollar maktaduai 364 zet a thawh a, hei bakah hian West Bank-a roreltu, Palestinian Authority hnenah kumtinin dollar maktaduai 400 vel a pe ṭhin bawk. 

Mahse US President-in Israel khawpui atana Jerusalem an pawm thu a puan chungchangah, US thutlukna dodal zawnga Palestinian miten nawrh an huaihawt leh, ram hrang hrangten US an demna thu an aupui avangin, President Donald Trump chuan Palestinian-te hnena chhawmdawlna an pek ṭhin chu tihtawpah a vau a ni. 

Trump hian Palestinian-te chu kumtin dollar maktaduai tel an pe chunga, an lakah lawmna emaw zahna emaw engmah an lantir let ve duh lo niin a sawi. Chhawmdawlna pek ṭhin hi tihtawpah vau mah se, a taka kalpui a la ni lo a, mahse agency laka innghat, Palestinian raltlante chuan an hlauthawng tawh hle a ni. 



Share this Post

Login to comment
No Comments