Putin-an Syria aṭangin Russia sipai lachhuak dawn

Russia President Vladimir Putin chuan Thawhṭanni khan Syria a tlawh a, Syria rama Russia sipai an dahte chu lakchhuah ṭhen an ni dawn tih a sawi. 

Vladimir Putin hian sawi lawk loin Syria hi a tlawh a,  Russian Hmeymim airbase a tlawh a ni. Defence Minister Sergei Shoigu chuan Russia sipaite hi lakchhuah ṭan nghal an nih thu a sawi. Mahse Putin hian nikum khan Syria aṭanga Russia sipaite lakchhuah an nih tur thu a lo sawi tawh a, mahse sipaite hi dah chhunzawm zel an ni ta tho a ni. 

Russia sipaite lakchhuah kim an nih  hun tur zawhna chhangin, Shoigu chuan Syria tualchhung dinhmun a zirin a nih tur thu a sawi. 

Russia hian Syria ramah hian military base pahnih Hmeymim airbase leh Tartus naval base a nei a ni. Kumin January thla khan Syria nen inremna ziakin, Lataka province-a Hmeymin airbase hi Russia-in kum 49 chhung a hman phalsak a ni. He airbase aṭang hian Russia indo thlawhtheihnate chuan kum hnih liamta aṭang khan Syria rama Islamic State (IS) ralthuam dahna hmunte leh an hmun pawimawh dangte an lo bei fo tawh a ni. 

Tartus naval base hi Syria hmar thlang lama awm a ni. January thlaa inremna an siamah hian Russia-in Tartus base hi kum 49 a hman phalsak a nih bakah, hemi hnuah pawh pawhsei zel remtih a ni bawk. 

Putin hian nakkuma an ram president thlanna neih tura chuh leh a tum thu a lo sawi tawh a, tuna Syria aṭanga sipaite a lakchhuah hian mipuite rilru-ah pawh a tlak nat phah rin a ni. 



Share this Post

Login to comment
No Comments