Damdawi lem vangin mi sing tel thi :WHO

World Health Organisation (WHO) chuan ram ṭhang mek, developing country  hrang hranga damdawi hralhchhuah 10 zinga pakhat chu a lem emaw, ṭha tawk lo emaw a ni tih sawiin, hei vang hian kumtinin mi sing telin an thihphah niin a sawi. 

WHO chuan damdawi lama sumdawnna, internet lama zawrhchhuahte chuan damdawi ṭha lo hralhchhuah nan kawng a hawng niin a sawi. Africa ram naupang,  pneumonia leh malaria veite enkawlna pek pawh awmze nei lo tam tak a awm a ni, ati. 

Africa rama damdawi zuar ṭhenkhatte chuan mihring ei atana a him lam ngaihtuah aiin, dan kalha damdawi-a sumdawngte hnen aṭanga a man tlawm thei ang bera lak chu an ching fo nia sawi a ni. Hetianga dik lo taka damdawi siamah hian dose dik lo, ingredient dik lo te dah a ni a, hei bakah hian a dahṭhatna lam ṭhat tawk loh vangin damdawi tam tak chu a nih tur angin a pha lo niin a sawi bawk. 

Kum 2007-2016 inkar chhunga WHO in zirchianna 100 a buatsaihah damdawi sample 48,000 chuang enfiah a ni a, heta aṭang hian low and middle-income ram-a damdawi hralhchhuah zinga 10.5% chu a lem emaw, damdawi ṭha tawk lo emaw a ni tih hriatchhuah a ni. 



Share this Post

Login to comment
No Comments