California-a ram kang vangin mi tam tak insawnchhuak

US-a California state chhim lamah Thawhlehni zan khan nasa takin ram a kang leh a, hmanhmawh takin ram kanna bula cheng mi 27,000 te chu an insawnchhuak. 

Kangṭhelhtute chuan thli a tleh tel avangin ram kang hi a darh chak a, an thunun thei lo tih an sawi. Los Angeles hmarlam km 115 vela hla, Ventura leh Santa Paula khuaa chengte chu inthiarchhuah chhunzawm tura hriattir an ni bawk. Heng khawpui pahnihte hi Ventura County chhunga awm a ni. 

California Governor Jerry Brown chuan Ventura County-ah emergency a puang nghal a, kangmei chhuak ṭhelh hna chu theihtawpa thawh zel a nih tur thu a sawi. 

Official-te chuan kang ṭhelhnaah hian kangṭhelhtu pakhatin hliam a tuar a, structure 150 chuang a kang chhia niin an sawi. Mi 260,000 chuang chu power supply nei loin an awm phah bawk. 

Thawhlehni zana ram kang hi Thomas Fire tih a ni a, zanah la la hian kangṭhelhtu za telin an ṭhelh  nghal a, mahse an thunun zo lo a ni. Hemi zan hian ram acre 45,500 a zau a kang hman a ni. Meikhu a nasat avangin thuneitute chuan mihring hriselna a nghawng thei tih an sawi a, kum upa lam leh naupangte chu pawn chhuak lo turin an ngen. 



Share this Post

Login to comment
No Comments