US-in Israel khawpuiah Jerusalem a pawm dawn

US President Donald Trump chuan Israel khawpuia Jerusalem a pawm thu a puang dawn niin official-ten an sawi. Mahse President Trump hian US embassy chu Tel Aviv aṭangin Jerusalem-ah hian a sawn mai dawn hrih lo a ni. 

Jerusalem hi Israel leh Palestinian te tana hmun pawimawh tak a ni. He khawpuiah hian Juda, Islam leh Kristiante tana hmun thianghlim leh pawwimawh tak tak a awm a, a bikin East Jerusalem lamah a tam a ni. Israel chuan hmasang aṭanga tawhin Jerusalem chu a ram khawpui niin a chhal a, ṭhendarh theih a ni lo tih a sawi bawk. Hetihlai hian Palestinian-te chuan Palestinian ram a din hunah East Jerusalem chu an ram khawpui tur a nih thu an sawi thung. 

US-in Israel khawpuia Jerusalem a pawm thu a puang a nih chuan, kum 1948-a modern Israel a din hnuah pawmsaktu ram hmasa ber a ni ang. 

President Trump hian Israel-a US embassy, Tel Aviv ami chu Jerusalem-a sawn a lo tiam tawh a, hemi atana hma lak dan tur ngaihtuah turin state department official-te pawh a hrilh nia sawi a ni. Hei hi Palestinian bakah Arab ram hrang hrangte chuan na taki an sawisel a, Jerusalem-a US embassy sawn anih chuan Israel-Palestinian inkara remna leh muanna a awm theihna tura hmalakna thlengin a nghawng pawi thei dawn niin an sawi. 

Israel khawpuia Jerusalem pawm a nih chuan, East Jerusalem-a Israel sorkarin Juda-te chenna in a sak pawh dan ang taka kalpui anga pawmsak a ni dawn a ni. President Trump hian a thutlukna a puan hma hian Israel Prime Minister Benjamin Netanyahu bakah, Middle East hruaitu hrang hrangte pawh a be kual nia sawi a ni. 

Palestinian President Mahmoud Abbas chuan President Trump-a thutlukna siam hian nghawng ṭha lo tak a nei ngei dawn niin a sawi a, Middle east bakah khawvel pum huapa remna leh secuirty thlengin a nghawng dawn a ni, a ti. Jordan lal King Abdullah chuan he thutlukna hi Israel-Palestinian inkara inremna kawng zawnga hmalakna tihchhiatna a nih thu leh, Muslim ramte a tih thinur hle tur thu a sawi. Egypt President Abdul Fattah al-Sisi pawhin boruak tichhe zawnga thil ti lo turin Trump a ngen. Turkey President Recep Tayyip Erdgogan chuan US-in Israel khawpuia Jerusalem a pawm a nih chuan Israel nena an inlaichinna a chhiat phah tur thu a sawi bawk. Gaza Strip-a roreltu, Hamas pawl hotu Ismail Haniya chuan US embassy awmna hmun sawn leh, khawpui atana Jerusalem sawn chu dan phalna piahlam vek a ni, a ti. France, European Union leh Arab League pawhin US thutlukna siam hian nghawng ṭha lo a neih ngei tur thu an sawi bawk. 

Hetih lai hian Israel intelligence minister Israel Katz chuan thil eng pawh, tharum thawhna thleng pawh nise an inbuatsaih tih a sawi. US sorkar chuan Israel rama an mi leh sa  hnathawka awm leh an chhungte chu venthawn thilah Jerusalem Old City leh West Bank lamah zin lo turin a hriattir tawh bawk a ni. 



Share this Post

Login to comment
No Comments