Iran-Iraq ramri-ah magnitude 7.3-a nain lir a nghing

Iran leh Iraq ramri bulah Pathianni zan dar 9:18  khan magnitude 7.3-a nain lir a nghing a, lirnghing vanga chhiatna thlengah mi 201 an thi a, a midang 1600 velin hliam an tuar bawk. 

US Geological Survey chuan lir nghin ṭanna hi ramri bul, Iran khawchhak lam Halabja chhim thlang lam km 31 vela hla, km 33.9-ah thukah anih thu a tarlang. Lirnghing vang hian in tam tak a chim a, in chimin a delhte chhanchhuah  hna thawh mek a ni. 

Official-te chuan lirnghinna bial hmun ṭhenkhat chu tlawhpawh theih an la ni lo a, heng hmunte hi tlawhpawh a nih hunah thi zat report pawh hi a la punchhoh an rin thu an sawi.:  Lirnghing tuar nasa ber hi Iran khawthlang lam, Kermanshah province a ni a, he province hi Iraq ramri aṭanga km 15-a hlaa awm a ni. Kermanshah province-ah hian lirnghing vanga  thi hi mi 97 an tling tawh a, thuneitute chuan mitthite hi ni thum chhung sun an nih tur thu an puang nghal a ni. Iraq-ah pawh lirnghing vang hian mi paruk an thi a ni. 

Lirnghing vang hian hmun tam takah lei a min a, leimin vang hian chhanchhuah hna thawh tur pawh a khaihlak phah niin Iran emergency service hotu, Pir Hossein Koolivand chuan a sawi. 

 Iran leh Iraq ramri bula khaw tam takin lirnghing vang hian power supply an nei lo a, lirnghing nawn leh (aftershock) hlauh vangin mi tam tak chu inah awm zui ngam loin, khaw vawt hnuaiah kawtthlerah an tlaivar a ni.  Iran seismological centre chuan afterschock hi ṭum 50 chuang a thleng tawh a, a la thlen nawn belh zel an rin thu an sawi. 

Iranian Interior Minister Abdolreza Rahmani Fazli chuan kawngpui ṭhenkhat chu leiminin a hnawh avangin khaw ṭhenkhat dinhmun an hre thei lo a,  ṭanpui hna thawk turin sipaite tirhchhuah nghal an nih thu a sawi. Iranian Red Crescent hotu chuan mi 70,000 chuang chu ṭanpui ngaiin an awm mek niin a sawi bawk. 

Iraq lamah chuan Kurdistan Region-a Darbandikhan khua chu lirnghing tuar nasa ber a ni a, mi 30 chuangin hliam an tuar. Kurdish Health Minister Rekawt Hama Rasheed chuan khaw chhunga hospital pui ber chu lirnghing hian a tichhia a, power supply a awm loh bawk avangin hliam tuarte hi km 75-a hla, Sulaimaniyah khua panpui an nih thu a sawi. Lirnghing hian building eng emaw zat a tichhia niin a sawi. 

Pathiannia lirnghing hi Turkey, Israel leh Kuwait pawhin an hre thei a ni. 

Iran-ah hian lir a nghing fo a, kum 2003 khan magnitude 6.6-a naa lir a nghin avangin Iran chhim chhak lam, Bam khua chu nasa takin a chhia a, mi 26,000 an thi a ni.

Pathianni zan khan Japan khawchhak lam tuipui kamah magnitude 5.8-a nain lir a nghing bawk. Lirnghin ṭanna hi Sendai, Honshu-a leihnuai km 9.5-a thukah a ni a, thil tihchhiat liantham a a nei lo a, tsunami pawh a thlen hlauhthawnawmin a awm lo.  Costa Rica-ah pawh Pathianni zan vek khan magnitude 6.5-a nain lir a nghing bawk a, he lirnghing hi an ram khawpui San Joe chhim thlang lam, km 69-a hla aṭanga nghing ṭan a ni. 



Share this Post

Login to comment
No Comments