US-in Korean Peninsula chungah bomber thlawh tir

US sipiate chuan Thawhlehni zan khan Korean Peninsula chungah Air Force B-1B Lancer bomber an thlawh tir. 

B-1B bomber pahnihte hi South Korea sipaite chuan F-15K fighter pahnihin an zui bawk a ni. North Korea-in nuclear leh missile programme a kalpui avangin ramdang, a bikin US nena an inkar boruak a chhe chho hle a, ram hruaitute pawhin invauna thu an chhakchhuak fo a ni. 

South Korea Joint Chiefs of Staff chuan nimin khan thuchhuah siamin, Korean Peninsula-a US bomber thlawh tir anih thu hi a sawi a, US sipaite pawhin thuchhuah hran siamin drill an neih thu leh, Japanese fighter-te pawhin an zawm ve thu a sawi.

Bomber pahnihte hian South Korea boruak chin an thlen  hnuah khawchhak lam tuipui kamah air-to-ground missile drill an nei nghal a, hemi hnu hian SKorea leh China inkar tuipui chungah thlawkin drill hi a nei leh a ni.  South Korean military chuan hei hi regular execise a nih bakah, US leh SKorea inkar thawhdunna lantirna pakhat a nih thu a sawi. 

US bomber-te hi Guam-a Andersen Air Force Base aṭanga thlawk chhuak an ni a, August thla khan NKorea chuan Guam thliarkar hi kahah a lo vau tawh a ni. 



Share this Post

Login to comment
No Comments