Catalonia independence puan hun tur tikhawtlai (head)

Catalonia hruaitu, Carles Puigdemont chuan Spain aṭanga Catalonia bial independence puan hun tur a tikhawtlai. 

Calres Puigdemont chuan Catalonia bial mipuite vote laknaa a tam zawkin independence an duh thu an sawi chu a pawm tih a sawi a, mahse Spain sorkar nen inbiakna neih  phawt a nih theih nan independence puan a tum chu a ṭhulh rih a ni. 

October 1 khan Catalan parliament chuan Spain aṭanga independence duh leh duh loh chungchangah vote lak a ni a, vote thlaktu zinga 92% in independence hi an duh a ni. Mahse vote thlak hi pawl ṭhenkhatin an boycott avangin vote tla hi 43% chauh a tling nia sawi a ni. 

Thawhlehni khan Catalan regional parliament chuan independence chungchang hi debate an nei a, hemi ni vek hian Spain aṭanga indan thu hi puan tum ni mah se, an tikhawtlai ta a ni. 

Parliament-a thu a sawiah, Puigdemont chuan October 1-a vote lak aṭangin, Catalonia miputie chuan independence state nih an duh a, chumi tipuitling turin kawng an zawh mek tih a sawi. President a nih angin Catalonia chu independent state a nih thu a puan ngei  tur thu a sawi a, mahse inbiakna kalpui a nih theihnan independence puan nghal mai an tum chu an tikhawtlai rih tih a sawi. 

Catalan President-in independence puan hun tihkhawtlai a nih thu a sawi hnuah, Spain sorkar laipui chuan nimin khan hemi chungchang ngaihtuah hian cabinet meeting a ko  nghal. Spain deputy Prime Minister Soraya Saenz de Santamaria chuan Puigdemont chuan Catalonia chu dinhmun mumal lo takah a dah tih sawiin, a thiltih chu a hrechiang lo a ni, a ti. 

Saenz de Santamaria chuan Catalonia mipuite vote lak chu dan kalha  kalpui a nih avangin Catalonia parliament pawhin a nemnghet thei lo niin a sawi.



Share this Post

Login to comment
No Comments