NKorea missile-in minute 14 chhungin Guam thleng thei

North Korea-in Guam beihna turin missile a kapchhuak a nih chuan he missile hian minute 14 chhungin US territory hi a thleng hman dawn niin, Guam thliarkara Homeland Security thupuangtu chuan a sawi. 

Homeland Security thupuangtu, Jenna Gaminde-i chuan chanchin thar lakhawmtute a kawmnaah, missile hi kah a nih chuan thliarkar-a All-Hazards Alert Warning System 15 siren-te chu tiriin, a michengte chu hriattir nghal an ni dawn tih a sawi. 

Hetih lai hian US President Donald Trump chuan North Korea ram a vauna hmasa chu a na tawk lo niin a sawi. Trump hian NKorea-in missile programme a kalpui chhunzawm zel chuan mei leh kat hmanga chhanlet a nih tur thu a sawi a, hemi chhan let nan hian NKorea chuan Pacific-a US terriroty, Guam thliarkar chu missile-a kahah a vau let ve a ni. 

President Trump chuan NKorea a vauna chu mi ṭhenkhatin a na lutuk em tiin zawhna te an siam a, mahse a nat loh thu a sawi. US Secretary of State Rex Tillerson pawhin NKorea vauna chu hlau lo tura America mipui chahin, zanah pawh thlamuang taka mu turin a chah. 



Share this Post

Login to comment
No Comments